Rama forcon tonet ndaj protestave: Asnjë turmë apo mish-mash nuk ka mandat të flasë në emër të sovranit

Kryeministri Edi Rama ka adresuar një reagim të fortë lidhur me zhvillimet e fundit dhe protestat, duke theksuar se nuk ka asnjë grupim apo individ që mund të uzurpojë vullnetin e qytetarëve. Ai bëri të qartë se kur flet për mbrojtjen e rendit dhe qetësisë, ka në mendje të gjithë qytetarët që dëshirojnë të lëvizin lirshëm në kryeqytet, të dërgojnë fëmijët në shkollë dhe të vijojnë jetën e tyre të pëititshme pa u cenuar nga aktet e dhunës, gurët dhe zjarri i një turme agresive. Duke vënë në pikëpyetje legjitimitetin e organizatorëve, shefi i qeverisë e cilësoi opozitën dhe grupet pjesëmarrëse si një bashkim të paprecedentë interesash. Sipas tij, bëhet fjalë për një përzierje kategorish, individësh, grupesh shoqërore dhe subjektesh politike pa asnjë pikë takimi ideologjik apo parimor, të cilët sipas tij kanë marrë peng Tiranën dhe kërkojnë me forcë dorëheqjen e ekzekutivit pa pasur asnjë lloj autorizimi ligjor apo popullor. Rama kujtoi se në një sistem demokratik, mandati për të drejtuar nuk jepet nga grupe të caktuara apo turma të verbuara nga zemërimi, por ekskluzivisht nga sovrani. Ai theksoi se e drejta e secilit për të protestuar dhe për të shprehur bindjet e veta përfundon aty ku fillon liria e qytetarëve të tjerë, duke vijuar se kapërcimi i këtij kufiri përmes dhunës rikujton praktikat e errëta të së kaluarës totalitare. Në fjalën e tij, kreu i qeverisë u bëri thirrje qytetarëve të bëjnë dallimin mes të drejtës demokratike dhe akteve që cënojnë bashkëjetesën paqësore. Ai shtoi se pasojat e veprimeve të tilla ekstremiste janë të njohura historikisht për mbarë shoqërinë shqiptare.