Skemë shfrytëzimi në Dimal, organi i akuzës kërkon dy dekada burg për dy të pandehurit

Prokuroria pranë Gjykatës së Shkallës së Parë të Juridiksionit të Përgjithshëm Berat ka paraqitur pretencën për dy persona të akuzuar për veprën penale të shfrytëzimit të prostitucionit. Për shtetasin R.L., akuza ka kërkuar 12 vite heqje lirie, ndërsa për bashkëpandehurin e tij, E.V., është kërkuar dënimi me 9 vite burg, duke çuar në total në 21 vite kërkesën për dënimin e tyre. Sipas materialeve të procedimit penal nr. 256 të vitit 2025, hetimet kanë zbardhur se dy të dyshuarit kanë detyruar shtetasen Y.Sh. të ushtrojë prostitucion, duke përfituar në rrugë financiare nga kjo veprimtari e paligjshme. E dëmtuara ka dëshmuar se bashkëjetuesi i saj, R.L., jo vetëm që ishte në dijeni të plotë të kësaj praktike, por edhe arkëtonte të ardhurat e siguruara nga ajo, ndërsa klientët kontaktoheshin përmes ndërmjetësimit të E.V., kurse përfitimet financiare ndaheshin në pjesë të barabarta mes dy autorëve. Gjatë dëshmisë së saj, viktima ka bërë me dije se aktivitetin e saj e ushtronte në territorin e Dimalit, në qarkun e Beratit. Ajo ka shtuar gjithashtu se dy të pandehurit kishin bërë plane për ta dërguar jashtë vendit, konkretisht në Greqi, me qëllim vazhdimin e shfrytëzimit, ku secili prej tyre pretendonte të merrte nga 500 euro në muaj. Në fazën e hetimeve, i pandehuri R.L. ka pranuar përgjegjësinë, duke deklaruar se kushtet e rënda ekonomike e kishin shtyrë atë që të orientonte bashkëjetuesen drejt ofrimit të shërbimeve seksuale. Ai ka pranuar po ashtu se në disa raste është përfshirë vetë në gjetjen e klientëve kundrejt pagesës. Nga ana e tij, organi i akuzës ka argumentuar se roli i R.L. ka qenë mjaft aktiv, pasi ai merrej me sigurimin e klientëve, përcaktimin e lokacioneve ku kryheshin takimet, vendosjen e çmimeve, si dhe grumbullimin e të ardhurave të gjeneruara. Sa i takon shtetasit E.V., hetimet kanë dëshmuar se ai e kishte marrë viktimën Y.Sh. në ambientet e lokalit të tij, duke e fshehur aktivitetin e vërtetë nën maskën e një valltareje, me qëllim që ta vinte në dispozicion të klientëve që vizitonin biznesin e tij. Me përfundimin e hetimeve paraprake, Prokuroria e Beratit i është drejtuar gjykatës me kërkesën për dënimin përfundimtar të dy të pandehurve, duke kërkuar 12 vite burg për R.L. dhe 9 vite burg për E.V.