Tragjedia në Pejë: Jeton Sylaj kërkon liri duke thënë se u mundua ta parandalonte ngjarjen, del në pah dëshmia rrëqethëse e viktimës

Gjykata Themelore në Pejë ka vendosur masën e paraburgimit prej 30 ditësh për të pandehurin Jeton Sylaj, i cili dyshohet për veprën penale “Mospërfillja e gjykatës”. Vendimi është marrë në seancën e mbajtur të martën, më 27 tetor, pasi organet e drejtësisë vlerësuar se ekzistojnë bazat ligjore për këtë masë sigurie. I dyshuari Sylaj është ish-bashkëshorti i Arlinda Zekajt, e cila mbeti e vrarë mbrëmjen e 25 tetorit. Krimi i rëndë dyshohet se u krye nga ish-kunati i viktimës, Albert Sylaj, vetëm pak kohë pasi e ndjera ishte drejtuar në Polici për të denoncuar dhunën në familje. Gjatë seancës dëgjimore, prokurori i shtetit, Argzon Hasi, ka paraqitur detajet nga rrëfimi i viktimës dhënë para njësisë së dhunës në familje. Sipas prokurorit, Arlinda Zekaj kishte treguar se ishte kanosur rëndë nga i pandehuri me fjalët “unë të thej, të mbys, çka lyp ti në shtëpinë time, ti nuk guxon më kështu me vepru, kush je ti”, para se t'ia merrte rrobat dhe t'ia hidhte ato në oborr. Në dokumentet e gjykatës pasqyrohet gjithashtu thirrja e dëshpëruar që viktima ia kishte drejtuar policëve natën e vrasjes: “A duhet me më vra mua Jetoni që ju policia atëherë ta arrestoni shizofrenin?”. Pavarësisht kësaj, i pandehuri gjatë procedurës hetimore fillimisht ishte mbrojtur në heshtje. Prokurori Hasi bëri të ditur se ndaj Jeton Sylajt figurojnë të hapura gjashtë raste penale, ku katër prej tyre i përkasin vitit 2026. Për këtë arsye, Prokuroria ka theksuar se ekziston rreziku real që i pandehuri të arratiset për t'i ikur drejtësisë nëse lihet i lirë. Në mbrojtje të tij, avokati i caktuar sipas detyrës zyrtare, Gani Kelmendi, ka kundërshtuar kërkesën për paraburgim. Ai ka deklaruar se klienti i tij ndien keqardhje të madhe për ngjarjen që ndodhi pa dëshirën e tij, duke mohuar që Sylaj të ketë ushtruar dhunë fizike ndaj ish-bashkëshortes. Sipas avokatit Kelmendi, i pandehuri kishte kërkuar ndihmën e Policisë që ta largonte viktimën nga shtëpia për shkak të raporteve të acaruara. Ai gjithashtu ka shtuar se pretendimet rreth fjalëve fyese nuk qëndrojnë dhe se nuk ka rrezik arratisjeje, pasi pasaporta e të pandehurit ndodhet e sekuestruar te organet e hetuesisë. Në fjalën e tij para trupit gjykues, vetë Jeton Sylaj ka kërkuar refuzimin e paraburgimit me arsyetimin se ka një fëmijë 12-vjeçar, i cili aktualisht gjendet në një gjendje të paqartë dhe ka nevojë urgjente për kujdesin e tij prindëror.