Liga Rajonale: Përfaqësuesja U16 e Kosovës në hendboll nis përgatitjet, publikohet lista e lojtarëve

Pas paraqitjes së vashave të Kombëtares U16 të Kosovës, radha u ka ardhur hendbollistëve të rinj të cilët do të bëhen gati për të garuar në kuadër të Ligës Rajonale “U16 Regional Challenge Cup”. Në këtë garë ndërkombëtare, Përfaqësuesja U16 e Kosovës është vendosur në Grupin C, ku do të ketë përballë Maqedoninë e Veriut dhe Malin e Zi. Takimet e këtij grupi do të organizohen në kryeqytetin malazez, Podgoricë, gjatë periudhës 6 deri më 8 nëntor. Për sa i përket kalendarit të ndeshjeve, djemtë tanë do të përballen fillimisht me Maqedoninë e Veriut më 7 nëntor, duke filluar nga ora 13:00, kurse një ditë më vonë, më 8 nëntor, me fillim nga ora 12:00, do të matin forcat me nikoqirët e Malit të Zi. Për ta nisur këtë cikël të ri sfidash, kandidatët për një vend në përzgjedhjen kombëtare U16 janë mbledhur këtë të mërkurë për të nisur fazën e radhës të grumbullimit. Seancat stërvitore po zhvillohen në qytetin e Ferizajit dhe do të zgjasin deri të premten. Gjatë kësaj kohe, koordinatori i gjeneratave të reja në Federatën e Hendbollit të Kosovës (FHK), Bujar Qerimi, ka zyrtarizuar listën e plotë me lojtarët e ftuar për këtë ngjarje. Kjo Ligë Rajonale konsiderohet një gurthemel tejet i rëndësishëm për rritjen, edukimin sportiv dhe avancimin e mëtutjeshëm të talenteve të rinj të hendbollit. Lista e hendbollistëve të ftuar përfshin emrat e mëposhtëm: Ajan Muqolli (KH Besa Famgas), Adri Shaboviq (KH Besa Famgas), Bled Gjuka (KH Besa Famgas), Glerti Çekaj (KH Deçani), Laurent Gjocaj (KH Deçani), Fabian Cacaj (KH Deçani), Leart Sumaj (KH Deçani), Flondrit Mavraj (KH Istogu), Shaban Kajtazaj (KH Istogu), Orges Mavraj (KH Istogu), Albion Selmani (KH Kastrioti), Adonis Ahmeti (KH Kastrioti), Rron Xhaferi (KH Kastrioti), Elvidon Murtezi (KH Llapi), Ali Bajqinovci (KH Prishtina), Zenel Kastrati (KH Prizreni), Albion Jahaj (KH Prizreni), Endri Krasniqi (KH Prizreni), Elif Hajrullaga (KH Rahoveci), Erdi Vuqitërna (KH Rahoveci), Lis Shabani (KH Trepça), Unik Shabani (KH Trepça), Kron Kurshumliu (KH Trepça), Aldion Rrahmani (KH Trepça), Ensar Sadiku (KH Trepça), Enis Kadriu (KH Trepça), Anes Abazi (KH Ulpiana), Leonis Osmanaj (KH Vëllaznimi), Inri Cula (KH Vëllaznimi), Atik Zoni (KH Vushtrria).