Masë e rreptë disiplinore: UEFA godet sërish Cërvena Zvezdën me gjobë të majme dhe mbyllje stadiumi

Shtëpia evropiane e futbollit, UEFA, ka marrë masa ndëshkimore të ashpra ndaj klubit serb Cërvena Zvezda, pas sjelljeve të papranueshme të tifozëve të saj gjatë angazhimeve ndërkombëtare, një klub që shpesh është përfshirë edhe në provokime publike ndaj shtetit të Kosovës në platformat e tij zyrtare. Sipas njoftimeve zyrtare, pas përballjes kundër skuadrës së Kopenhagës, klubi nga Beogradi është ndëshkuar me një gjobë prej 83.500 eurosh. Krahas kësaj gjobe financiare, institucioni më i lartë i futbollit kontinental ka vënë në zbatim edhe dënimin me kusht që ishte marrë më 25 gusht të këtij viti, pas ndeshjes së zhvilluar kundër Viktorias së Plzenit. Në bazë të vendimit zyrtar të UEFA-s, gjatë ndeshjes së ardhshme evropiane ku Cërvena Zvezda do të jetë nikoqire, një pjesë e stadiumit "Rajko Mitiç", saktësisht sektori 3 i tribunës veriore, do të mbyllet plotësisht për publikun. Vlen të theksohet se vetëm rreth një muaj e gjysmë më parë, klubi serb ishte gjobitur sërish me 98.250 euro për shkak të sjelljes josportive dhe skandaloze të tifozëve të tyre në transfertën ndaj Viktorias në Plzen. Duke llogaritur të dyja rastet e fundit, shuma totale e gjobave që Cërvena Zvezda duhet t'i paguajë UEFA-s arrin shifrën prej 181.750 eurosh.