Kombëtarja U15 shkëlqen në “Shtëpinë e Futbollit”, mposht Hungarinë falë perlatit të Rouen Damit

Përfaqësuesja e Shqipërisë U15 ka regjistruar një fitore mjaft të rëndësishme në ndeshjen miqësore kundër Hungarisë U15, e cila u zhvillua në ambientet e “Shtëpisë së Futbollit”. Talentet kuqezi kontrolluan rrjedhën e lojës përgjatë pjesës më të madhe të takimit, ndërsa momenti vendimtar i duelit u firmos nga Rouen Dani gjatë fraksionit të parë të lojës. Për këtë përballje, tekniku Bledar Borova hodhi në fushë nga minuta e parë formacionin e përbërë nga: Genis Mlloja, Gabriel Haka, Ergi Syziu, Uvejs Kadriu, Sergen Jakupi, Rogers Mecja, Damian Qatipi, Ersan Senko, Patrik Shurdhaqi, Savio Disha dhe Rouen Dani. Goli i avantazhit erdhi në minutën e 20-të të sfidës. Ishte pikërisht Rouen Dani që përfitoi nga një pakujdesi në prapavijën hungareze dhe, pasi u ndodh i vetëm përballë portierit kundërshtar, nuk gaboi duke e dërguar topin në rrjetë dhe duke kaluar Shqipërinë në epërsi. Një kontribut të çmuar në këtë triumf dha edhe portieri Genis Mlloja, i cili u shfaq vendimtar në disa raste me pritjet e tij spektakolare, duke mbajtur të paprekur portën kuqezi. Gjatë 45 minutave të dyta, talentet shqiptare krijuan edhe raste të tjera shënimi, mirëpo mungesa e përqendrimit para portës dhe ndërhyrjet e portierit hungarez bënë që shifrat të mbeten të pandryshuara deri në vërshëllimën përfundimtare. Kjo përballje kontrolli i ka shërbyer trajnerit Bledar Borova për të testuar gjendjen fizike dhe teknike të grupit, duke u dhënë gjithashtu hapësirë aktivizimi edhe lojtarëve të tjerë të nisur nga stoli. Ky test ka qenë tejet i dobishëm për kuqezinjtë, të cilët vijojnë intensivisht punën për të ndërtuar një skuadër sa më kompakte dhe për të ngritur nivelin e tyre të lojës në të ardhmen.