Ben Affleck zbulon ironinë e fëmijëve të tij: “Më tallin kur flas për dashurinë”

Aktori i njohur i Hollywood-it, Ben Affleck, ka ndarë një detaj mjaft argëtues nga jeta e tij familjare, duke rrëfyer se përpjekjet e tij për të këshilluar fëmijët mbi çështjet e zemrës nuk priten gjithmonë me seriozitet. Sipas aktorit, fëmijët e tij nuk ngurrojnë ta vënë në lojë për historikun e tij romantik. Në një moment të sinqertë, Affleck tregoi se djali i tij 17-vjeçar e ka sfiduar hapur, duke ironizuar rolin e tij si këshillues me pyetjen: “Ti qenke ekspert për marrëdhëniet?”. Kjo thumboje e të birit lidhet drejtpërdrejt me eksperiencat e kaluara të aktorit në jetën bashkëshortore. Aktori është baba i tre fëmijëve të ardhur nga martesa me ish-bashkëshorten, Jennifer Garner. Dyshja, e cila kurorëzoi dashurinë në vitin 2005, i dha fund martesës së tyre në vitin 2018. Më vonë, në vitin 2022, Affleck u martua me këngëtaren Jennifer Lopez, një lidhje që përfundoi gjithashtu me divorc gjatë vitit 2024. Pavarësisht ndarjes së fundit nga Lopez, Affleck ka zgjedhur të flasë me tone pajtuese, duke theksuar se marrëdhënia e tyre u mbyll pa konflikte të bujshme publike. Nga ana tjetër, ai gëzon një raport tejet korrekt dhe miqësor me Jennifer Garner, për të cilën shpreh vazhdimisht mirënjohje të thellë. Lidhja e tyre profesionale dhe personale mbetet mjaft e ngushtë, aq sa Affleck kishte shprehur dëshirën që Garner të ishte partnerja e tij në ekran në filmin “Animals”. Megjithatë, aktorja nuk e pranoi rolin, i cili përfundimisht iu besua Kerry Washingtonit, duke mos ndikuar aspak në marrëdhënien e mirë mes ish-çiftit.