Sukses historik për shqiptarët në Serbi, Kurti: Arritëm rezultatin më të lartë që prej vitit 2000

Kryeministri i Republikës së Kosovës, Albin Kurti, ka bërë të ditur se Koalicioni Shqiptar në zgjedhjet e zhvilluara të dielën në Serbi ka shënuar rekordin e votave për bashkatdhetarët tanë atje që nga viti 2000, duke siguruar gjithsej 27 mijë e 607 vota. Sipas kreut të ekzekutivit, ky sukses tregon qartë domosdoshmërinë e unitetit ndërmjet partive politike shqiptare, pavarësisht divergjencave që mund të kenë mes tyre. Kurti vuri në dukje se komuniteti shqiptar u pozicionua i dyti për numrin e votave dhe i pari sa i përket mandateve, krahas komunitetit hungarez, mes të gjitha listave të pakicave kombëtare në Serbi. “Të dielën që lamë pas, u mbajtën zgjedhjet në Serbi, në këto zgjedhje pati disa arritje historike. Koalicioni Shqiptar morri 27.607 vota, ky është rezultati më i lartë i shqiptarëve që nga viti 2000. Plot 1.233 vota më shumë se sa në vitin 2020, kur u patën fituar tri mandate. Me rritjen prej 35% të koeficienteve zgjedhore për pakicat kombëtare, ky rezultat ka ekuivalentin përllogaritës të 37.354 votave. Shqiptarët janë pakica e katërt për nga popullsia në Serbi, por janë renditur të dytët për nga votat dhe të parët për nga mandatet, së bashku me hungarezët ndër listat e pakicave kombëtare”, deklaroi ai. Në fjalën e tij, shefi i qeverisë kosovare komentoi edhe zhvillimet e tjera politike në vendin fqinj, duke veçuar suksesin e listës studentore që u rendit e para, si dhe humbjen e shumicës parlamentare nga koalicioni i udhëhequr nga presidenti serb Aleksandar Vuçiq, ndërkohë që formacioni politik i Ivica Daçiqit mbeti jashtë institucionit legjislativ. “Në anën tjetër, Lista Studentore doli e para. Koalicioni i Vuçiqit e humbi shumicën parlamentare, ndërsa lista e Daçiqit mbeti jashtë Kuvendit. Një çerek shekulli pas humbjes së Millosheviqit dhe Shexhelit, edhe pasardhësit e tyre politikë, Vuçiqi dhe Daçiqi, humbën. Ky rezultat kaq i mirë për shqiptarët vjen natyrisht si rezultat i bashkimit të të gjitha forcave në një, për çka e falënderoj secilin subjekt politik atje për vullnetin e tyre që përkundër dallimeve të bashkohen për një kauzë tejet të rëndësishme siç është jeta më e mirë, më e drejtë dhe më e dinjitetshme e shqiptarëve”, përfundoi Kurti.