Vrasja e Arlinda Zekajt, Kurti kërkon llogari nga ministritë dhe thotë se pati dështime institucionale

Kryeministri i Republikës së Kosovës, Albin Kurti, ka deklaruar se pret që deri nesër në orën 18:00 të ketë në tavolinë raportet zyrtare nga Ministria e Drejtësisë dhe Ministria e Punëve të Brendshme, lidhur me vrasjen e tragjike të Arlinda Zekajt. Këto dokumente synojnë të hedhin dritë mbi lëshimet e mundshme në çdo hallkë të sistemit, si dhe të adresojnë raste të ngjashme, duke paralajmëruar se gratë viktimë të dhunës mbeten të rrezikuara nga personat që i kërcënojnë. Gjatë mbledhjes së ekzekutivit, kreu i Qeverisë ka qenë i ashpër në qëndrimin e tij, duke pranuar hapur se përgjegjësitë institucionale nuk janë përmbushur si duhet. "Kanë mbetur edhe 34 orë për hartimin dhe dorëzimin e këtij raporti; nesër në mbrëmje, para orës 18:00, pres raportet dhe sigurisht se do t'i ndaj me publikun", ka theksuar Kurti para kabinetit qeveritar. Në fjalën e tij, ai ka përsëritur gjithashtu domosdoshmërinë që sistemi i drejtësisë në Kosovë të kalojë në një fazë urgjente reformimi dhe orientimi të duhur.