I jepet fund arratisë: Arrestohet i dyshuari për vrasjen makabër të Arlinda Zekajt në Vitomiricë

Pas dy ditësh kërkime intensive, Albert Sylaj, personi i dyshuar për vrasjen e rëndë të 49-vjeçares Arlinda Zekaj në Vitomiricë të Pejës, ka rënë në prangat e Policisë së Kosovës. Operacioni për kapjen e tij u finalizua mbrëmjen e së martës, rreth orës 23:40, në territorin e komunës së Deçanit. Sipas njoftimit zyrtar, arrestimi u mundësua falë angazhimit të shtuar operativ dhe hetimor, si dhe bashkëpunimit të frytshëm me qytetarët, të cilët kontribuan në lokalizimin e të dyshuarit. Policia e Kosovës ka shprehur mirënjohjen për ndihmën e dhënë nga publiku gjatë këtij procesi. Detaje rreth rrethanave të arrestimit tregojnë se Sylaj, përpara se të binte në duart e forcave të rendit, kishte kërkuar të negocionte kushtet e dorëzimit, duke shprehur dëshirën për të komunikuar fillimisht me familjarët e tij. Sipas informacioneve nga terreni, operacioni është zhvilluar nga njësitet speciale, pas një rezistence të shfaqur nga i dyshuari. Gjatë kohës që ishte në arrati, ai dyshohet se kishte shfaqur qëndrime kërcënuese ndaj autoriteteve, duke deklaruar se nuk do të dorëzohej i gjallë. Në këtë aksion të gjerë policor morën pjesë njësi speciale nga Drejtoritë Rajonale të Gjakovës dhe Pejës, të mbështetura nga forca të ardhura nga Prishtina. Ndërkohë, autoritetet pritet të ofrojnë detaje shtesë mbi zhvillimin e këtij operacioni kompleks. Albert Sylaj po kërkohej nën dyshimin për kryerjen e veprës penale “Vrasje e rëndë”. Ngjarja tragjike ndodhi më 25 tetor, rreth orës 21:00, kur viktima Arlinda Zekaj dyshohet se u privua nga jeta me sëpatë nga ish-kunati i saj. Krimi ndodhi në momentet kur 49-vjeçarja sapo ishte kthyer në shtëpi, pas një vizite në Stacionin Policor në Pejë, ku kishte kërkuar ndihmë për shkak të dhunës në familje.