Koalicioni VLEN ndërmerr hapin vendimarrës: Siguri dhe stabilitet pune për mijëra punonjës të administratës publike

Pas një periudhe të gjatë pasigurie dhe pritjesh për vazhdimësinë e marrëdhënies së punës, po i hapet rruga zgjidhjes përfundimtare të një padrejtësie shumëvjeçare që ka prekur mijëra qytetarë të angazhuar me kontrata në institucionet publike, bëjnë të ditur nga koalicioni VLEN. Sipas kësaj force politike, koordinatori i grupit parlamentar të VLEN-it ka zyrtarizuar nismën duke nënshkruar dhe dorëzuar, në cilësinë e bashkëpropozuesit, projektligjin për kalimin e të angazhuarve nga kontratat e përkohshme në punësim të rregullt dhe afatgjatë. Kjo nismë legjislative synon të përfshijë të gjithë ata persona që plotësojnë kriteret e parapara në projektligj dhe që ushtrojnë funksionet e tyre në institucionet e përcaktuara. Bëhet fjalë për individë që për vite me radhë kanë mbajtur mbi supe përgjegjësi serioze dhe kanë kryer detyrat zyrtare, duke u ballafaquar vazhdimisht me pasigurinë e vazhdimit të kontratave të punës. "Ne gjithmonë kemi thënë se vendi i punës dhe buka e familjes nuk guxojnë të përdoren për shantazh apo për t’i mbajtur punonjësit nën varësi politike", thuhet në reagimin e VLEN-it. Procesi i transformimit të statusit në punësim të përhershëm është planifikuar të realizohet në disa faza, në përputhje me afatet e përcaktuara në projektligj. Ky dokument gjithashtu përfshin mekanizma mbrojtës për punonjësit gjatë gjithë procedurës, verifikim të fondeve financiare, si dhe masa konkrete për t'i dhënë fund praktikës së mbajtjes së stafit me kontrata të përkohshme për vite me radhë. Nga VLEN theksojnë se deputetët e tyre do të angazhohen maksimalisht për miratimin e kësaj kornize ligjore, pa bërë asnjë lloj dallimi. Me votimin dhe zbatimin e këtij ligji në praktikë, angazhimi dhe kontributi shumëvjeçar i këtyre punonjësve do të kurorëzohet më në fund me sigurinë dhe qetësinë e munguar profesionale.