Mexhiti pret në Shkup Haxhiun: Thellimi i partneritetit mes Kosovës dhe Maqedonisë së Veriut mbetet synim kyç

Kryetari i Kuvendit të Republikës së Kosovës, Albulena Haxhiu, është pritur në një takim miqësor në Çarshinë e Vjetër të Shkupit nga njëri prej liderëve të koalicionit VLEN, Izet Mexhiti. Në fokus të këtij takimi ishin marrëdhëniet dypalëshe ndërmjet Kosovës dhe Maqedonisë së Veriut, si dhe mundësitë për zgjerimin e bashkëpunimit institucional në fusha me interes strategjik për të dyja palët. Sipas kabinetit të Mexhitit, bashkëbisedimi u përqendrua te domosdoshmëria e konsolidimit të fqinjësisë së mirë, e cila mbështetet mbi ura të forta historike, kulturore dhe shoqërore mes dy shteteve. Gjithashtu, palët trajtuan rëndësinë e mbajtjes së një kanali të hapur komunikimi ndërinstitucional dhe zbulimit të hapësirave të reja për bashkëpunim që i shërbejnë zhvillimit ekonomik dhe shoqëror. “Ishte kënaqësi e veçantë të mirëpresim në Shkup Kryetaren e Kuvendit të Republikës së Kosovës, Albulena Haxhiu. Kosova dhe Maqedonia e Veriut ndajnë lidhje të rëndësishme historike, kulturore dhe vëllazërore, të cilat përbëjnë një bazë të qëndrueshme për thellimin e bashkëpunimit tonë. Gjatë bashkëbisedimit theksuam rëndësinë e dialogut të vazhdueshëm, forcimit të marrëdhënieve institucionale dhe avancimit të iniciativave me interes të përbashkët. Besoj se bashkëpunimi i ngushtë ndërmjet dy vendeve është në shërbim të zhvillimit, stabilitetit dhe perspektivës sonë të përbashkët”, u shpreh Mexhiti gjatë takimit. Në mbyllje të këtij takimi, Mexhiti falënderoi Haxhiu për vizitën e saj në Shkup, duke i përcjellë urimet më të sinqerta për suksese në detyrën e saj të lartë shtetërore, ndërsa riafirmoi përkushtimin e përbashkët për të ruajtur dhe kultivuar marrëdhënie të shkëlqyera fqinjësore mes Prishtinës dhe Shkupit.