Raporti i auditimit për MTD-në, ministria jep sqarimet: Sfidat janë të trashëguara, po i japim zgjidhje

Ministria e Transformimit Digjital (MTD) ka reaguar pas publikimit të raportit të Entit Shtetëror për Auditim për buxhetin e vitit 2024, i cili vuri në pah çështje si 16 objektet me vlerë simbolike prej një denari dhe mungesën e stafit në 43 për qind të vendeve të punës. Nga ky dikaster bëjnë me dije se bëhet fjalë për sfida të mbartura ndër vite, disa prej të cilave tashmë janë kapërcyer, ndërsa të tjerat po trajtohen me prioritet. Nga MTD-ja theksojnë se gjetjet dhe rekomandimet e auditimit merren me seriozitet të lartë, pasi shërbejnë si një mekanizëm kyç për forcimin e punës institucionale, rritjen e disiplinës financiare dhe sigurimin e transparencës. Sipas institucionit, shumica e parregullsive të konstatuara i takojnë periudhës së ish-Ministrisë së Shoqërisë së Informacionit dhe Administratës, duke u grumbulluar për më shumë se një dekadë. E themeluar në vitin 2024, Ministria e re e Transformimit Digjital ka trashëguar regjistra jo të plotë, çështje pronësore të pazgjidhura, procese gjyqësore dhe mangësi administrative që kishin mbetur pa u adresuar. Në njoftim theksohet gjithashtu se gjatë dhjetë viteve të fundit nuk ishte realizuar një regjistrim i plotë dhe substancial i pronave, fakt që ka sjellë mospërputhje të theksuara mes gjendjes në terren, librave kontabël dhe dokumentacionit zyrtar. Sa i përket pasurive të evidentuara me vlerë kontabël prej një denari, nga MTD-ja sqarojnë se ky është produkt i të dhënave të parregullta të trashëguara dhe nuk reflekton vlerën reale të tyre në treg. Aktualisht, ministria është angazhuar në procesin e rregullimit të statusit pronësor, përditësimit të të dhënave dhe vendosjes së rregullit në administrimin e pasurisë shtetërore, ndërkohë që për pjesën tjetër të vërejtjeve po merren masa korrigjuese. Në fund, nga ky dikaster shtojnë se janë trashëguar edhe një sërë procedurash gjyqësore, të cilat e kanë burimin te vendimet dhe detyrimet financiare të krijuara gjatë mandateve të kaluara.