Operacion antidrogë në Gjakovë: Bllokohet mbi një kilogram kokainë dhe armatim luftarak

Policia e Kosovës ka ndërmarrë një aksion të suksesshëm në qytetin e Gjakovës, ku gjatë kontrollit të një banese dhe hapësirave përcjellëse ka arritur të sekuestrojë sasi të konsiderueshme të lëndëve narkotike, armë dhe municion. Operacioni është udhëhequr nga hetuesit e Sektorit Rajonal për Trafikim me Narkotikë, të cilët kanë vepruar në bazë të urdhëresës së lëshuar nga Gjykata Themelore e Gjakovës ndaj një të dyshuari të ri, mashkull kosovar i lindur në vitin 2004. Në njoftimin zyrtar të Policisë bëhet e ditur se gjatë bastisjes së ambienteve janë zbuluar dhe konfiskuar si prova materiale rreth 1009.35 gramë substancë e dyshuar narkotike e llojit kokainë, si dhe 4.14 gramë marihuanë. Po ashtu, autoritetet kanë gjetur edhe një armë automatike, një karikator me 24 fishekë të kalibrit 9x19mm, dy karikatore të tjera me 20 fishekë të kalibrit PPU 32, si dhe para të gatshme në valuta të ndryshme: 1175 euro, 200 franga zvicerane, 1 dollar amerikan, 200 lekë dhe 100 rubla ruse. Krahas tyre, janë sekuestruar edhe dy telefona celularë (njëri prej tyre i dëmtuar), një peshore digjitale dhe një fletore me shënime të ndryshme që lidhen me rastin. Lidhur me këto gjetje, është vënë në dijeni prokurori kujdestar i Departamentit për Krime të Rënda pranë Prokurorisë Themelore në Gjakovë. Me urdhër të tij, ndaj të dyshuarit është caktuar masa e ndalimit policor prej 48 orësh. Ndërkohë, i dyshuari është shoqëruar për në ambientet e paraburgimit dhe është marrë në pyetje nga hetuesit në prani të avokatit mbrojtës, i cili i është caktuar sipas detyrës zyrtare.