Tragjedia në Pejë, Ambasada Gjermane: Femicidi alarm shoqëror, kërkohet mbrojtje urgjente për gratë në rrezik

Ambasada e Gjermanisë në Prishtinë ka shprehur tronditjen dhe pikëllimin e saj të thellë lidhur me vrasjen e Arlinda Zekajt, ngjarje e rëndë e shënuar në Vitomiricë të Pejës. Përmes një reagimi zyrtar, misioni diplomatik ka nënvizuar se çdo grua gëzon të drejtën fundamentale për të jetuar pa frikë dhe pa dhunë, një e drejtë që kërkon garanci përmes përpjekjeve kolektive dhe veprimeve të prekshme. Duke u shprehur ngushëllime familjarëve dhe miqve të viktimës, ambasada ka vënë theksin te domosdoshmëria e sigurimit të mbrojtjes institucionale për gratë që përballen me rrezik. “Kjo tragjedi e dhimbshme shërben si një kujtesë e fortë se femicidi nuk është një rast i izoluar, por mbetet një sfidë serioze shoqërore, si manifestimi më ekstrem i dhunës ndaj grave, që kërkon një reagim të vazhdueshëm dhe të koordinuar. Garantimi i sigurisë dhe mbrojtjes së grave në rrezik duhet të mbetet një prioritet i përbashkët, i mbështetur nga masat efektive parandaluese, veprimet institucionale në kohë dhe shërbimet mbështetëse të qasshme”, thuhet në deklaratë. Gjithashtu, nga ky dikaster diplomatik u risoll ndërmend fakti se Kosova është palë në Konventën e Këshillit të Europës për parandalimin dhe luftimin e dhunës ndaj grave dhe dhunës në familje. Në fund, u është bërë thirrje të gjithë faktorëve institucionalë dhe shoqërorë që të intensifikojnë përpjekjet për parandalimin e dhunës me bazë gjinore, të zbatojnë me rigorozitet mekanizmat ekzistues mbrojtës dhe të ndërtojnë një mjedis ku dhuna nuk pranohet dhe nuk anashkalohet në asnjë rrethanë.