Nis zbatimi në terren: Hapen punimet për segmentin kyç të autostradës Shkup-Bllacë

Kanë nisur zyrtarisht punimet ndërtimore për fazën e dytë të autostradës Shkup-Bllacë, një projekt infrastrukturor me gjatësi prej 10 kilometrash. Makineritë e rënda të kompanisë fituese janë vendosur tashmë në terren, duke shënuar hapin e parë konkret të realizimit të kësaj vepre të rëndësishme rrugore. Sipas projektit teknik, ky aks parasheh ndërtimin e rreth 40 objekteve, duke përfshirë 5 tunele në të dyja anët, 8 ura, 11 nënkalime, 4 galeri dhe 9 mure mbajtëse anësore. Afati i parashikuar për përfundimin e punimeve është 4 vjet. Ndërkohë, procesi i shpronësimit ka arritur në mbi 65% dhe nuk përbën më pengesë, ndryshe nga praktikat e kaluara në projekte të ngjashme. Këto zhvillime vijnë fiks dy muaj pas ceremonisë së vënies së gurthemelit. Financimi i këtij investimi të rëndësishëm mbështetet nga disa burime: një kredi prej 167,6 milionë eurosh siguruar nga Banka Evropiane për Rindërtim dhe Zhvillim, një grant prej 30,82 milionë eurosh nga Korniza e BE-së për Ballkanin Perëndimor, ndërsa pjesa e mbetur prej 23,58 milionë eurosh mbulohet nga buxheti i N.P. “Rrugët Shtetërore”. Vlera e vetë projektimit ka kapur shifrën e 3,1 milionë eurove, fonde këto të siguruara përmes granteve për kompanitë projektuese SH.A. “Omega” dhe “Hill International”. Autostrada do të ketë nga dy korsi qarkullimi në secilin drejtim, me gjerësi prej 3,5 metrash secila, si dhe nga një korsi emergjente me gjerësi 2,5 metra. Përfaqësuesit e institucioneve sqaruan se afati dy-mujor i kaluar nga gurthemelimi deri në nisjen e punimeve ka pasur arsyet e veta teknike. Kompania “Granit”, e cila ka lidhur kontratë zyrtare me shtetin, do të jetë realizuesja e punimeve për këtë segment 10,5 kilometrash. Vlera totale e kontratës arrin në 222 milionë euro, shumë që përfshin gjithashtu pesë vjet mirëmbajtje pas inaugurimit zyrtar të rrugës, ngjarje kjo e parashikuar të ndodhë në verën e vitit 2030. Vlen të theksohet se segmenti i parë prej 2 kilometrash i kësaj autostrade u përball me zvarritje të shumta ndër vite dhe përfundoi si një aks pa dalje funksionale.