Kreu i NATO-s: Moska nën presion, jemi plotësisht të gatshëm ndaj çdo lloj kërcënimi

Aleanca Veriatlantike është tërësisht e përgatitur për t'u kundërpërgjigjur ndaj çdo incidenti sabotimi apo sulmi me dronë në territorin evropian, duke pasur tashmë gati strategjitë e duhura përballë këtyre rreziqeve. Kështu ka deklaruar Sekretari i Përgjithshëm i NATO-s, Mark Rutte, gjatë një fjalimi të mbajtur të enjten në Nju-Jork, në kuadër të aktiviteteve përkujtimore për sulmet e 11 shtatorit 2001 kundër Shteteve të Bashkuara. “Rusia po intensifikon veprimet e saj në hapësirën kibernetike dhe fusha të tjera, mirëpo Aleanca është plotësisht e gatshme për ta përballuar këtë situatë,” theksoi Rutte, duke shtuar se organizata zotëron të gjitha instrumentet e nevojshme për të garantuar sigurinë përballë kërcënimeve hibride. Sipas kreut të NATO-s, shtimi i rasteve të tilla në vendet anëtare dëshmon qartë se presidenti rus Vladimir Putin po dështon në fushata e tij ushtarake në Ukrainë, konflikt ky që ka hyrë tashmë në vitin e tij të pestë. “Putini ndodhet në një pozitë të vështirë,” u shpreh Rutte, duke nënvizuar se Rusia nuk është duke e fituar luftën dhe se popujt e 32 shteteve anëtare mund të ndihen të sigurt. Ai u bëri thirrje aleatëve që të shtojnë ndihmën për Ukrainën, nëse dëshirojnë t’i japin një mesazh të qartë Moskës lidhur me çdo incident apo sulm hibrid. “Të gjitha opsionet e reagimit janë në tryezë dhe ne do të veprojmë me çfarëdo mjeti që të jetë i nevojshëm,” përfundoi ai. Këto deklarata vijnë menjëherë pas paralajmërimit të dhënë të enjten nga shërbimi i inteligjencës së Danimarkës, i cili ngriti alarmin për rrezikun në rritje të provokimeve ushtarake ruse kundër vendeve të NATO-s, përfshirë operacione të reja hibride. Ndërkohë, sipas njoftimeve nga Spanja, shërbimet e inteligjencës amerikane kanë vënë në gatishmerí vendet evropiane për një skenar të mundshëm të sulmeve ruse me dronë që mund të kenë në fokus Spanjën, Francën ose Italinë.