Afati prej katër javësh rrezikon të kapërcehet: Asnjë hap i konkretizuar në Kuvend për Ligjin e Speciales

Pavarësisht paralajmërimeve për një kohëmatës prej katër javësh, procesi për rishikimin dhe plotësimin e Ligjit për Dhomat e Specializuara ka ngecur. Edhe pse ka kaluar afro një javë prej kur ky akt ligjor u kthye zyrtarisht në Kuvend nga ana e presidentes Justina Shiroka-Pula, deri më tani nuk është ndërmarrë asnjë veprim konkret dhe nuk është caktuar ndonjë kalendar diskutimesh. Kthimi i ligjit në institucionin legjislativ erdhi pas kërkesës zyrtare të paraqitur më 22 tetor nga Grupi Parlamentar i Partisë Demokratike të Kosovës (PDK). Kjo lëvizje pasoi miratimin e ndryshimeve të diskutueshme që u votuan me procedurë të përshpejtuar gjatë seancës së mesnatës së 6-7 tetorit, ku njëkohësisht u zgjodh edhe presidentja e re e vendit. Sipas kërkesës së dorëzuar nga PDK-ja, nisma kishte për qëllim garantimin e një sigurie më të lartë juridike dhe përmirësimin e dispozitave të caktuara, pa qenë nevoja që puna të nisë nga e para në Qeveri. Në dokumentin e dorëzuar presidentes Shiroka-Pula, PDK-ja theksoi se mbrojtja e vlerave të Ushtrisë Çlirimtare të Kosovës dhe mbështetja për ish-krerët e saj në Hagë mbeten obligime të panegociueshme. Subjekti politik kërkoi që procesi të finalizohet shpejt, duke shprehur besimin se ligji mund të miratohet brenda afatit katërjavor të vendosur fillimisht. Megjithatë, megjithëse kanë kaluar tashmë gjashtë ditë nga vendimi i presidencës, debatet parlamentare nuk kanë filluar dhe nuk ka ende ndonjë njoftim zyrtar se kur mund të rinisë shqyrtimi i tij në seancë plenare apo në komisione. Në kuadër të këtij procesi, PDK-ja ka ftuar ekspertët dhe Avokatin e Popullit që të dorëzojnë propozimet e tyre konkrete për të kontribuar në këtë fazë përfundimtare të legjislacionit. Nga ana tjetër, vendimi për ta rikthyer ligjin në Kuvend është mirëpritur nga Bashkimi Europian. Brukseli, i cili fillimisht kishte shprehur shqetësim të thellë për ndryshimet e njëanshme të miratuara në muajin tetor, ka kërkuar që të përfshihet në konsultime të rregullta para çdo ndryshimi të mëtejshëm ligjor. Këto ndryshime në ligjin e Speciales erdhën si reagim pas 21 ditësh protestash qytetare, të cilat kundërshtuan vendimin e shkallës së parë ndaj katër ish-udhëheqësve të UÇK-së: Hashim Thaçi, Kadri Veseli, Jakup Krasniqi dhe Rexhep Selimi. Paketa e ndryshimeve përfshin propozime për ngushtimin e juridiksionit të mandatit të gjykatës, kufizimin e dënimeve deri në 15 vjet burgim, transferimin e shkallës së Supremes për t'u zhvilluar brenda vendit, si dhe mundësinë që të dënuarit t'enë subjekt i faljes presidenciale.