Situata e Armando Brojës mbetet në terr informativ, Bërnli ende pa një komunikatë zyrtare

Te klubi i Bërnlit vazhdon të mbretërojë heshtja zyrtare lidhur me gjendjen shëndetësore të Armando Brojës, i cili u detyrua ta braktiste fushën e blertë që në minutat e para të përballjes kundër Linkolnit për shkak të një dëmtimi. Në përfundim të asaj sfide, trajneri i atëhershëm Niki Hejen – i cili u shkarkua menjëherë pas ndeshjes – bëri të a ditur se sulmuesi kuqezi kishte ndjerë një “kërcitje në ije”, duke ngritur shqetësime se dëmtimi mund të rezultojë mjaft i rëndë për të ardhmen e tij në fushë. Megjithatë, drejtuesit e skuadrës angleze ende nuk kanë dalë me një njoftim zyrtar për të sqaruar shkallën e dëmtimit të lojësit të kombëtares shqiptare apo kohëzgjatjen e parashikuar për rikuperimin e tij. Ndërkohë, skena sportive në Britani është e përfshirë nga diskutimet rreth pasardhësit të Niki Hejen në stolin e Bërnlit, pasi largimi i tij ka hapur garën për drejtimin teknik të skuadrës. Burime pranë futbollit anglez bëjnë me dije se trajneri zviceran Fabio Çelestini është favoriti kryesor për të marrë frerët e ekipit dhe madje ka udhëtuar drejt ishullit për të finalizuar marrëveshjen dhe për të hedhur firmën në kontratë. Çelestini ka njohur majat e karrierës së tij trajneriale përmes fitimit të dy titujve kampion me Bazelin, ndonëse aventurat e tij më të fundit, përfshirë edhe periudhën në krye të CSKA-së së Moskës, nuk kanë ecur sipas pritshmërive të ish-mesfushorit të kombëtares së Zvicrës.