Përplasje masive në autostradën zvicerane: Shtatë të plagosur dhe shoferi i dyshuar arratiset nga vendi i ngjarjes

Një aksident i rëndë zinxhir, ku janë përfshirë katër automjete, ka ndodhur në autostradën A12 pranë Matranit, në kantonin e Freiburgut të Zvicrës, duke lënë të plagosur shtatë persona. Personi që dyshohet se ka shkaktuar përplasjen është larguar nga vendi i ngjarjes pa pritur mbërritjen e autoriteteve, ndërkohë që identitetit i tij mbetet ende enigmë. Incidenti u regjistrua të hënën, rreth orës 16:30, në segmentin rrugor ndërmjet Matranit dhe daljes Fribourg-Sud, në kahun e lëvizjes drejt Bernës. Bazuar në të dhënat e policisë kantonale, një makinë është futur në autostradë përmes korsisë së emergjencës, duke provokuar një seri përplasjesh mes katër veturave që po qarkullonin në atë moment. Për pasojë, shtatë persona pësuan lëndime trupore dhe u transportuan me autoambulanca drejt spitaleve përkatëse për të marrë ndihmën e nevojshme mjekësore. Sipas hetimeve paraprake të policisë, drejtuesi i mjetit që hyri i pari në autostradë nuk është ndalur për të dhënë llogari apo ndihmë, por është larguar me shpejtësi. Autoritetet vendase ende nuk kanë arritur ta lokalizojnë dhe po bashkëpunojnë ngushtë për zbardhjen e identitetit të tij. Ky aksident masiv solli bllokimin e plotë të qarkullimit rrugor në këtë pjesë të autostradës A12, pasi makinat e shkatërruara kishin bllokuar korsitë e kalimit. Ndërhyrja e ekipeve të shpëtimit u vështirësua ndjeshëm për shkak të mungesës së një korridori emergjence, i cili duhet të formohet nga drejtuesit e automjeteve për t'i hapur rrugë mjeteve të ndihmës së shpejtë që të mbërrijnë në kohë rekord në vendin e ngjarjes. Aksesi në autostradë mbeti i bllokuar për afro tri orë, kohë gjatë së cilës ekipet e emergjencës kryen veprimet e duhura në terren, policia nisi hetimet paraprake dhe mjetet e dëmtuara u larguan nga ekspertët e rimorkimit. Në vendin e ngjarjes kanë mbërritur edhe ekspertët e Njësisë së Hetimit të Aksidenteve pranë Policisë Kantonale të Freiburgut. Ata janë duke analizuar të gjitha provat për të përcaktuar shkaqet e sakta të këtij incidenti dhe për të kapur shoferin e arratisur. Procedurat hetimore për zbardhjen e plotë të rrethanave të këtij aksidenti vijojnë ende.