Bojkoti paralizon GJKKO-në: Dështojnë qindra seanca dhe ndëshkohen avokatët

Përplasja mes avokatëve mbrojtës dhe Gjykatës së Posaçme ka hyrë në një fazë kritike, duke sjellë bllokimin e rreth 500 proceseve gjyqësore. Protesta e ndërmarrë nga trupa e avokatëve kundër rregullores së re, e cila sipas tyre cenon ushtrimin e profesionit dhe transparencën, ka çuar në vendosjen e gjobave të njëpasnjëshme ndaj tyre. Avokati Lorenc Danaj, i cili bën pjesë në listën e të gjobiturve, tregon se tashmë i hequr veten nga përfaqësimet në këtë institucion dhe ka njoftuar klientët për pamundësinë e ushtrimit të mbrojtjes derisa të ketë një zgjidhje përfundimtare. Sipas tij, masat ndëshkuese nuk janë rruga e duhur për të zgjidhur një ngërç të tillë institucional. “Kjo është një ngërç institucional. Kjo situatë nuk duhet të përshkallëzohet me masa ndëshkuese, por kërkon një dialog për të gjetur shkaqet që kanë çuar në këtë situatë dhe për ta korrigjuar atë. Qëndrimi i avokatëve duhet të jetë unik. Nuk mund t’u mohohet një e drejtë. Palët duhet të ulen në dialog”, u shpreh Danaj, duke paralajmëruar se gjobat e vendosura do të dërgohen për shqyrtim në Gjykatën Administrative. Ndërkohë, situata e krijuar ka shkaktuar paqartësi edhe brenda vetë gjykatës, ku trupat gjykuese janë ndarë në dy qasje: disa prej tyre po mjaftohen me shtyrjen formale të seancave, ndërsa të tjerë po aplikojnë gjobitje ndaj mbrojtësve. Një shqetësim të ngjashëm ka ngritur edhe avokati Gentian Rumano, i cili thekson se pesha e vërtetë e kësaj krize nuk qëndron te aspekti ekonomik. “Dëmi nuk është financiar në këtë situatë, këtu bëhet fjalë për dëmin që i bëhet drejtësisë dhe palëve”, deklaroi Rumano. Pavarësisht bojkotit që ka nisur që prej datës 8 shtator, Gjykata e Posaçme jo vetëm që nuk ka bërë asnjë hap pas lidhur me rregulloren e diskutueshme – e cila prek gjithashtu edhe qasjen e medias – por ka sugjeruar madje edhe ndryshime shtesë në kuadrin ligjor. Në kuadër të masave emergjente që po shqyrtohen për të shmangur paralizimin total, gjykata ka paralajmëruar mundësinë e zhvillimit të seancës gjyqësore ndaj ish-presidentit Ilir Meta pa praninë e avokatëve. Një kërkesë e ngjashme është paraqitur zyrtarisht edhe nga prokurorët e SPAK-ut për procesin penal që lidhet me kryetarin e bashkisë, Erion Veliaj.