Nga Serie A te shkretëtira, Igli Tare pranë një aventure të bujshme në Arabinë Saudite

Igli Tare është gati të nisë një kapitull krejtësisht të ri në karrierën e tij si drejtues sportiv. Pas periudhës së fundit te Milani, e cila u mbyll para kohe dhe pa arritjen e synimeve të duhura, ish-sulmuesi i kombëtares shqiptare po kërkon një sfidë të freskët për t'u rikthyer fuqishëm në skenë. Edhe pse emri i tij është lakuar shpesh për pozicione të ndryshme në klubet italiane, duket se pistat më konkrete për të ardhmen e tij tani të theksohen në Lindjen e Mesme. Interesimi nga Arabia Saudite është kthyer në një mundësi reale për profesionistin shqiptar. Sipas gazetarit të njohur italian, Françesko Porzio, gjatë emisionit “Al-Montasaf”, Igli Tare dhe drejtuesit e klubit saudit Al Ahli po zhvillojnë bisedime intensive. Palët janë në tryezën e negociatave që Tare të marrë përsipër drejtimin sportiv të klubit. Krerët e Al Ahli synojnë të përfitojnë maksimalisht nga bagazhi dhe syri i mprehtë i Tares në merkato. Ata besojnë se eksperienca e tij do të jetë vendimtare për të afruar lojtarë me cilësi të lartë dhe për të ngritur nivelin e skuadrës. Pavarësisht se gazetari Porzio e ka cilësuar Taren si një figurë me karakter të fortë dhe jo aq të lehtë për t'u bashkëpunuar për shkak të natyrës së tij strikt, drejtuesit e klubit arab nuk tërhiqen. Ata vijojnë bisedimet me vendosmëri për t'i besuar atij postin e drejtorit sportiv, vend ky që ka mbetur vakant që prej largimit të portugezit Rui Pedro në muajin shtator.