Talenti shqiptar shkëlqen përballë Messit, trajneri i New York Red Bulls: Ka aftësi të jashtëzakonshme teknike

Futbollisti me origjinë shqiptare, Adri Mehmeti, ka qenë një ndër figurat kryesore në triumfin 2:0 të New York Red Bulls kundër Inter Miamit, duke marrë vëmendjen e opinionit sportiv me paraqitjen e tij mbresëlënëse në duel me yllin argjentinas, Lionel Messi. Mesfushori 17-vjeçar pati një rol kyç në organizimin dhe kontrollin e ritmit në mesfushë, duke regjistruar plot 82 prekje të topit dhe 55 pasime të sakta përgjatë 85 minutave që kaloi në fushën e blertë. Gjatë kësaj kohe, ai realizoi edhe 10 rikuperime të topit, duke u shpallur lojtari me performancën më defensive në këtë aspekt përballë gjithë protagonistëve të tjerë në fushë. Nga ana tjetër, Lionel Messi, i cili e nisi takimin nga bankina rezervë, u hodh në lojë gjatë pjesës së dytë, mirëpo nuk mundi të shmangte humbjen apo të ndryshonte fatin e ndeshjes. Me këtë fitore komode, New York Red Bulls arkëtoi tri pikë tejet të vlefshme në luftën e tyre për një pozicionim optimal drejt fazës eliminatore në MLS. Pas përfundimit të ndeshjes, trajneri i skuadrës nga New Yorku, Michael Bradley, nuk i kurseu lëvdatat për pjekurinë dhe potencialin e madh të mesfushorit të ri. “Adri ka personalitet, aftësi teknike dhe një kuptim shumë të mirë të lojës. Për një 17-vjeçar, ai mban mbi supe shumë përgjegjësi në ekip dhe nuk trembet aspak”, u shpreh Bradley gjatë konferencës për shtyp. Impresionues ka qenë edhe komenti i bashkëlojtarit të Mehmetit, Mohammed Sofo, i cili u shpreh hapur për admirimin që ka ndaj cilësive të mesfushorit shqiptar. “Pjekuria e tij është e jashtëzakonshme. Ai e di kur duhet të luajë përpara dhe kur duhet ta qetësojë lojën. Ndonjëherë bën gjëra që më lënë pa fjalë”, përfundoi Sofo.