Bashkëpunimi mes Kosovës dhe Maqedonisë së Veriut në fokus: Haxhiu takon Gashin në Shkup

Kryetarja e Kuvendit të Republikës së Kosovës, Albulena Haxhiu, në kuadër të vizitës së saj zyrtare në Maqedoni të Veriut, ka zhvilluar një takim të rëndësishëm me kreun e legjislativit të këtij vendi, Afrim Gashin. Gjatë bisedës mes dy homologëve u shqyrtuan mundësitë për intensifikimin e partneritetit ndërparlamentar, me theks të veçantë te aktivizimi i komisioneve dhe grupeve të miqësisë. Po ashtu, Haxhiu dhe Gashi trajtuan rëndësinë e mekanizmave parlamentarë në mbikëqyrjen e zbatimit të marrëveshjeve dypalëshe, me qëllim që ky bashkëpunim të prodhojë rezultate të prekshme për qytetarët e të dyja vendeve. Kryetarja e Kuvendit të Kosovës i shprehu mirënjohjen homologut të saj Gashi për mbështetjen e vazhdueshme që Maqedonia e Veriut i ofron Kosovës në arenën ndërkombëtare dhe në proceset e integrimit e të anëtarësimit në organizata ndërkombëtare. “Marrëdhëniet ndërmjet dy shteteve janë më të qëndrueshme kur kanë mbështetje të gjerë në parlamentet e tyre, si te shumica, ashtu edhe te opozita. Prandaj kuvendet tona kanë një rol të veçantë në afrimin e mëtejshëm të Kosovës dhe Maqedonisë së Veriut”, theksoi Kryetarja Haxhiu.