Mospërfillja e urdhrit të gjykatës: Del para drejtësisë ish-bashkëshorti i së ndjerës Arlinda Zekaj

Jeton Sylaj, ish-bashkëshorti i tashmë ndjerës Arlinda Zekaj, është paraqitur sot para Gjykatës Themelore në Pejë, ku po shqyrtohet kërkesa e Prokurorisë për caktimin e masës së paraburgimit ndaj tij. Seanca gjyqësore po mbahet e mbyllur për publikun dhe mediat. Prokuroria Themelore në Pejë, konkretisht Departamenti i Përgjithshëm, e ngarkon Sylajn me dyshimin se ka kryer veprën penale “Mospërfillja e gjykatës”, e cila sankcionohet sipas nenit 393, paragrafi 1, të Kodit Penal të Republikës së Kosovës. Sipas dokumentit të Prokurorisë, incidenti dyshohet se ka ndodhur më 25 tetor 2026, rreth orës 17:58, në rrugën “Mon Dedushaj” në Vitomiricë të Pejës. I dyshuari akuzohet se ka shkelur aktvendimin e Gjykatës Themelore në Pejë të lëshuar më 16 tetor 2026, përmes të cilit i ishte ndaluar rreptësisht ushtrimi i dhunës fizike apo psikologjike ndaj Arlindës, pengimi i lëvizjeve të saj, si dhe çdo formë e fyerjes, shqetësimit apo kërcënimit. Organet e ndjekjes pretendojnë se Sylaj ka vazhduar me ushtrimin e dhunës psikologjike, duke i drejtuar asaj fjalë me përmbajtje kërcënuese. Po ashtu, ai dyshohet se ka nxjerrë rrobat e saj nga lavatriçja dhe i ka hedhur në oborrin e banesës. Në bazë të shkresave të lëndës, Arlinda Zekaj e kishte denoncuar zyrtarisht atë për dhunë në familje dhe kanosje më 10 korrik 2026. Gjatë paraqitjes në stacionin policor më 14 korrik, i dyshuari kishte preferuar të mbrohej në heshtje. Më 23 korrik, përballë prokurorit në Pejë, Sylaj kishte pranuar se e kishte kanosur verbalisht, por ishte arsyetuar se këtë e kishte bërë për shkak të djalit të tyre 12-vjeçar. “Unë e pranoj që kam kryer kanosje, e kam bërë vetëm për shkak të djalit tim”, kishte deklaruar ai gjatë procesverbalit. Gjatë dëshmisë së tij, ai kishte treguar se ishin ndarë rreth një vit më parë por pa e zyrtarizuar divorcin ligjërisht, duke qenë se ai jeton në Shtetet e Bashkuara të Amerikës, ndërsa ajo në Kosovë. Madje, Sylaj e kishte akuzuar ish-bashkëshorten se i kishte marrë pasaportën e Republikës së Kosovës. Në të njëjtën ditë, sipas raporteve policore, Sylaj e kishte dërguar djalin e mitur në stacionin e policisë në Pejë, me pretendimin se fëmija kërkonte urdhër mbrojtjeje nga nëna e tij. Pas intervistimit të fëmijës në prani të zyrtarëve të Qendrës për Punë Sociale, mbrojtësit të viktimave dhe psikologes, prokurori kujdestar kishte konkluduar se nuk kishte asnjë element të veprës penale nga ana e nënës. Prokuroria ka vlerësuar se kanosja ndaj Arlindës përmban të gjitha elementet e veprës penale “Kanosja” nga neni 181 i Kodit Penal, duke e cilësuar si të rëndë, të drejtpërdrejtë dhe të mjaftueshme për të ngjallur frikë e ankth te viktima. Ndër provat kyçe të siguruara në dosje është edhe një CD me video-incizime, ku i dyshuari dëgjohet duke përdorur fjalor fyes dhe kërcënues. Arlinda Zekaj u vra tragjikisht më 25 tetor, menjëherë pasi ishte kthyer në shtëpinë e saj në Vitomiricë të Pejës. Për këtë vrasje, si i dyshuar kryesor mbahet ish-kunati i saj, Albert Sylaj, në banesën e të cilit autoritetet policore gjetën dhe konfiskuan armë zjarri, municion dhe pajisje të tjera. Fëmija 12-vjeçar i viktimës ndodhet aktualisht i strehuar në një institucion mbrojtës në Kosovë, ndërsa ceremonia e varrimit të Arlindës është caktuar të mbahet sot në orën 15:00, në fshatin Radac. Kjo ngjarje tragjike ka nxitur reagime të fuqishme në opinionin publik dhe institucionet e vendit. Kuvendi i Kosovës miratoi të hënën me 67 vota një rezolutë të posaçme për mbrojtjen e grave dhe parandalimin e dhunës me bazë gjinore. Ndërkohë, kryeministri Albin Kurti u ka dhënë Ministrisë së Punëve të Brendshme dhe Ministrisë së Drejtësisë një afat prej 72 orësh për të ndërmarrë masa konkrete në rastet e rrezikut të lartë nga dhuna në familje.