Enrique ndan emocionet pas triumfit ndaj Lyonit: Kjo fitore është për Kvaratskhelian

Luis Enrique ka zgjedhur t'ia dedikojë suksesin e vuajtur të Paris Saint-Germain ndaj Lyonit (2:0) sulmuesit Khvicha Kvaratskhelia, i cili ka mbyllur parakohe sezonin për shkak të një dëmtimi të rëndë. Përballja u zhbllokua vetëm në 15 minutat e fundit të takimit, duke u siguruar parisienëve tri pikët e arta dhe ngjitjen në majë të renditjes në Ligue 1. Megjithatë, triumfi i kampionëve të Francës u la në hije nga atmosfera e zymtë në klub, pas konfirmimit se anësori gjeorgjian do të mungojë deri në fund të këtij edicioni, pasi u dëmtua rëndë në sfidën kundër Barcelonës, një mungesë kjo që lë një hapsirë të madhe në repartin ofensiv. “Bëhet fjalë për një triumf tejet të rëndësishëm dhe dëshirojmë t'ia dedikojmë atë Kvarës,” u shpreh strategu spanjoll, duke shtuar se skuadra është ndërtuar për të luftuar për çdo trofe dhe se çdo futbollist është i gatshëm të japë kontributin e tij në çdo çast. Sipas tij, ky rezultat konfirmon forcën e grupit gjatë një jave mjaft sfiduese për institucionin. “Mentaliteti ynë është të fitojmë gjithçka. Për t'ia dalë, duhet të jesh gjithmonë i gatshëm. Lojtarët që u aktivizuan dëshmuan vlerat e tyre dhe se meritojnë më shumë hapësirë. Është sfiduese për mua si trajner, por e vlerësoj jashtëzakonisht këtë karakter,” theksoi ai. Në fund, Enrique pranoi se ndeshja nuk ka qenë aspak e lehtë: “Patjetër që patëm një përballje shumë të vështirë përballë një kundërshtari cilësor si Lyon, që ka individualitete të larta dhe një trajner të zotë. Ishte vërtet sfiduese”.