Tragjedia në Pejë: Shoqja e Arlinda Zekajt rrëfen detaje nga e kaluara e ish-bashkëshortit të saj

Tragjedia që tronditi opinionin publik, ku Arlinda Zekaj dyshohet se u vra nga ish-kunati i saj në Pejë, vazhdon të zbardhet përmes dëshmive të njerëzve të afërt. Anna Zhubi, shoqja e ngushtë e viktimës, ka ndarë kujtimet e saj për marrëdhënien dhe personalitetin e të ndjerës. Zhubi e ka portretizuar Arlindën si një grua me virtyte të larta, duke e cilësuar atë si një njeri të butë, të sinqertë dhe jashtëzakonisht të dashur. “Përveç se ishte e fortë, kjo është jashtë diskutimit, Arlinda ishte një njeri shumë i dashur, i afërt, i sinqertë dhe i butë. Ajo i kishte të gjitha karakteristikat pozitive të një gruaje që kërkohej në rrethin tonë: të ishte nuse e mirë, e respektueshme, e dashur, e afërt dhe e butë”, ka deklaruar ajo. Duke folur për lidhjen e tyre, Zhubi ka treguar se dy gratë ishin njohur përmes bashkëshortëve të tyre, të cilët ruanin raporte miqësie me njëri-tjetrin. Po ashtu, ajo ka hedhur dritë mbi të kaluarën e ish-bashkëshortit të Arlindës, duke pohuar se ai kishte pasur konflikte me drejtësinë në Shtetet e Bashkuara të Amerikës shumë kohë para se të lidhej me të ndjerën, përfshirë një dënim me burgim për dhunë në familje. “Ne u njohëm përmes bashkëshortëve tanë, të cilët ishin shokë, dhe kështu filloi njohja jonë. Jetoni, në fakt, kishte probleme në Amerikë shumë kohë para Arlindës. Qysh në vitet 2000-2001, ai ishte i martuar me një shtetase amerikane, me të cilën kishte dy vajza binjake. Që atëherë ishte denoncuar për dhunë në familje dhe ishte burgosur për vite me radhë. Si rezultat i atij burgimi, ai i humbi kontaktet me dy vajzat. Fakti që ai ishte një lloj dhunuesi nuk ishte diçka e re në lidhje me Arlindën”, ka deklaruar ajo.