Agjenda e Kuvendit: Gjashtë komisione mblidhen sot për projektligje dhe plane strategjike

Kuvendi i Kosovës do të jetë sot vatër e aktiviteteve të ngjeshura parlamentare, pasi gjashtë komisione të ndryshme funksionale kanë planifikuar të mbajnë mbledhjet e lor. Në fokus të diskutimeve do të jenë shqyrtimi i disa nismave ligjore, mbikëqyrja e zbatimit të legjislacionit në fuqi, si dhe miratimi i planeve të punës për periudhat vijuese. E ardhmja energjetike, mbrojtja e konsumatorëve dhe zhvillimi ekonomik do të jenë në qendër të vëmendjes së Komisionit për Ekonomi, Industri, Ndërmarrësi, Tregti dhe Inovacion, i cili do të mblidhet në orën 10:00. Deputetët pritet të shqyrtojnë në parim Projektligjin për efiçiencë të energjisë dhe dekretin e presidencës për Ligjin për Mbrojtjen e Konsumatorit. Po ashtu, në këtë mbledhje do të hapet rruga për shpalljen e konkursit për drejtor të Autoritetit Rregullator për Shërbimet e Ujit (ARRU), ndërsa kryetarja e Autoritetit të Konkurrencës, Neime Binaku, do të paraqitet për të raportuar rreth gjendjes aktuale në këtë institucion. Në orën 10:30 do të nisë punimet Komisioni për Çështje të Sigurisë dhe Mbrojtjes. Pika kryesore e kësaj mbledhjeje do të jetë shqyrtimi në parim i Projektligjit për Agjencinë e Menaxhimit të Emergjencave, krahas procedurave standarde për miratimin e rendit të ditës dhe procesverbalit paraprak. Më pas, në orën 11:00, do të mblidhet Komisioni për Punë të Jashtme dhe Diasporë. Anëtarët e tij do të fokusohen te mbikëqyrja e zbatimit të ligjeve në fuqi dhe te funksionalizimi e organizimi i grupeve të miqësisë, krahas detyrave të zakonshme procedurale. Ndërkohë, në mesditë, saktësisht në orën 12:00, janë paraparë dy mbledhje paralele. Komisioni për Mirëqenie Sociale, Punë, Familje, Vlerat e Luftës Çlirimtare, Viktimat e Dhunës Seksuale të Luftës dhe për Persona të Pagjetur do të shqyrtojë dhe miratojë draft-planin e punës së Komisionit Funksional. Në të njëjtën kohë, Komisioni për Arsim dhe Shkencë do të diskutojë planin e punës dedikuar sesionit vjeshtor të vitit 2026, si dhe çështje të tjera me interes për sektorin përkatës. Cikli i mbledhjeve për ditën e sotme do të përmbyllet me Komisionin për Mjedis, Planifikim Hapësinor, Ushqim, Bujqësi, Pylltari, Zhvillim Rural, Infrastrukturë dhe Transport, i cili do të mblidhet në orën 13:00. Ky komision do të shqyrtojë në parim Projektligjin për Regjistrimin e Bujqësisë, si dhe Projektligjin për Inspektoratin Qendror të Bujqësisë, Sigurisë Ushqimore, Veterinës dhe Pylltarisë.