Tragjedi në Leposaviq: Gruaja gjen pa shenja jete vëllain e saj, nis hetimi për vdekje të dyshimtë

Një ngjarje e rëndë ka tronditur fshatin Kamen të Leposaviqit, ku një person është gjetur pa shenja jete në rrethana ende të paqarta. Sipas buletinit zyrtar 24-orësh të Policisë së Kosovës, alarmi është dhënë më 26 tetor, rreth orës 07:35. Një shtetase kosovare ka njoftuar autoritetet se kishte gjetur vëllain e saj të pajetë brenda territorit të fshatit. Pas daljes në vendin e ngjarjes dhe ndërmarrjes së veprimeve të para hetimore, me urdhër të prokurorit kompetent, trupi i pajetë është nisur drejt Institutit të Mjekësisë Ligjore (IML) për t'i nënshtruar obduksionit mjeko-ligjor. Autoritetet policore kanë iniciuar rastin si "vdekje e dyshimtë", ndërkohë që po vazhdojnë hetimet intensive për të zbardhur plotësisht shkaqet dhe rrethanat e këtij incidenti.