Tragjedia në Pejë: Vlora Çitaku kërkon dorëheqje institucionale dhe llogaridhënie pas vrasjes së Arlinda Zekajt

Ushtruesja e detyrës së kryetares së Partisë Demokratike të Kosovës, Vlora Çitaku, ka lëshuar një tjetër reagim të ashpër pas vrasjes tragjike të Arlinda Zekajt në Vitomiricë të Pejës. Ajo ka kërkuar haptazi përgjegjësi institucionale dhe largim nga detyra për të gjithë ata zyrtarë që dështuan në misionin e tyre për ta mbrojtur jetën e së ndjerës. Përmes një postimi në rrjetet sociale, zyrtarja e lartë e opozitës ka theksuar se në rrethana të tilla deklaratat e trishtimit janë të pamjaftueshme, ndërsa kërkohet veprim i menjëhershëm dhe llogaridhënie e drejtpërdrejtë për lëshimet e sistemit. “Meqë këtë nuk mund ta kthejmë më, ta kursejmë familjen e saj nga patetizmi. Dhimbjes së tyre i detyrohemi me veprime dhe përgjegjësi. Sot, kur po bëhen afro 20 orë nga kjo vrasje makabre, është e pafalshme dhe krejt e pashpjegueshme se si ende askush nuk ka marrë përgjegjësi, qoftë edhe përmes një dorëheqjeje morale. Sepse, të dashur kolegë, ekziston diçka edhe më e rëndë sesa dështimi institucional: dështimi njerëzor”, ka deklaruar Çitaku. Ajo ka vlerësuar se krahas strategjive urgjente për garantimin e sigurisë së grave dhe ndalimin e krimeve të tilla, akti i parë i domosdoshëm mbetet vendosja e përgjegjësisë, në mënyrë që shoqëria të shohë reagim real ndaj dështimeve shtetërore. “Prandaj, të gjithë ju që e dini se keni pasur përgjegjësi për mbrojtjen e Arlindës dhe keni dështuar ta përmbushni atë, nga nivelet më të ulëta deri në ato më të larta: jepni dorëheqje. Ky është minimumi moral që ju takon ta bëni. Po, shteti duhet ta trajtojë seriozisht dhe me urgjencë mbrojtjen e grave dhe parandalimin e vrasjeve të tyre, me të gjitha kapacitetet që ka në dispozicion dhe me veprime konkrete. Megjithatë, hapi i parë duhet të jetë llogaridhënia dhe marrja e përgjegjësisë, që qytetarëve t’u dërgohet një mesazh i qartë se dikujt në këtë shtet i dhemb vrasja e grave. E nëse nuk ka mbetur askush që e ndien vërtet këtë përgjegjësi, atëherë, njësoj si Arlinda, edhe unë uroj që të mos mund të flini më natën!”, ka përfunduar ajo.