Sekreti i qindvjeçarëve: Eksperti i njohur zbulon ushqimet që duhet t'i largoni menjëherë nga shtëpia

Eksperti i njohur i jetëgjatësisë, Dan Buettner, ka ndërtuar një karrierë të suksesshme duke analizuar dietat dhe mënyrën e jetesës së banorëve në të ashtuquajturat "zona blu", rajone në mbarë botën ku njerëzit jetojnë rregullisht mbi 100 vjet. Sipas tij, heqja dorë nga disa produkte të caktuara në kuzhinë mund të ndikojë ndjeshëm në zgjatjen e jetës. Studiuesi është përqendruar te zakonet e të ngrënit në këto zona, duke theksuar se ndonëse këto praktika mund të zbatohen kudo, ato shpesh kërkojnë zëvendësimin e ushqimeve të preferuara por të pashëndetshme me alternativa më cilësore. Në një paraqitje të fundit publike, Buettner theksoi se lejohet një konsumim herë pas here jashtë shtëpisë, por ekzistojnë disa produkte që nuk duhet të kapërcejnë kurrë pragun e banesës suaj, duke veçuar në radhë të parë mishin e përpunuar. "Ne e dimë se ato janë të lidhura me kancerin," u shpreh ai, ndërsa organizata Cancer Research UK konfirmon se mishi i kuq dhe i përpunuar – si proshuta, mishrat e konservuar dhe lloje të caktuara salçiçesh – lidhen me një rrezik të shtuar të kancerit të zorrës së trashë. Substancat kimike si nitratet dhe aminat heterociklike, që gjenden natyrshëm, shtohen gjatë përpunimit ose prodhohen gjatë gatimit në nxehtësi, dëmtojnë qelizat e zorrëve dhe rrisin rrezikun e sëmundjeve malinje me kalimin e kohës. Për të ulur këto rreziqe, rekomandohet kufizimi i mishit të përpunuar dhe zëvendësimi i tij me opsione më të shëndetshme si pula, gjeldeti, vezët dhe proteinat me bazë bimore, të cilat garantojnë një ekuilibër më të mirë ushqyes. Gjithashtu, Buettner ka dhënë alarmin edhe për ëmbëlsirat dhe pijet e gazuara, duke cilësuar pijet e ëmbla dhe produktet e paketuar si burimet kryesore të sheqernave të rafinuara. Për t'i bërë ballë këtij tundimi, ai këshillon që ato të mos blihen fare për t'u mbajtur në shtëpi. "Nëse dëshironi t'i shijoni këto ushqime, dilni dhe bliji atje. Mos i mbani vazhdimisht pranë jush dhe do të shihemi kur të mbushni njëqind vjeç," thotë eksperti. Konsumi i tepërt i sheqerit lidhet drejtpërdrejt me shtimin në peshë, rrezikun e sëmundjeve të zemrës, diabetin e tipit 2 dhe komplikimet e mëlçisë. Për të zëvendësuar ëmbëlsirat industriale, sugjerohet përdorimi i frutave të freskëta ose të thata, të cilat përveç se shuajnë dëshirën për sheqer, pasurojnë trupin me fibra, vitamina dhe minerale, duke ndihmuar edhe në menaxhimin e peshës trupore falë kalorive më të pakta. Frutat e thata përbëjnë një zgjedhje të shkëlqyer, por për shkak të përqendrimit të lartë të lëndëve ushqyese dhe sheqerit, kërkohet kujdes me madhësinë e porcioneve. Në përfundim të këshillave të tij, eksperti i jetëgjatësisë ka vënë theksin edhe te zakone të tjera të rëndësishme për një shëndet optimal.