Nga Budapesti në Nju Jork? Administrata Trump synon Viktor Orban për drejtimin e OKB-së

Përfaqësues të lartë brenda administratës së re amerikane të udhëhequr nga Donald Trump po shqyrtojnë seriozisht mundësinë e propozimit të ish-kryeministrit hungarez, Viktor Orban, për postin e Sekretarit të Përgjithshëm të Organizatës së Kombeve të Bashkuara. Sipas informacioneve të bëra publike, figura e Orbanit mund të shërbejë si një zgjedhje konsensuale mes Shteteve të Bashkuara, Rusisë dhe Kinës, me burime diplomatike nga të tria shtetet që konfirmojnë mbështetjen paraprake për këtë skenar. Kjo lëvizje vjen pas disfatës elektorale të Orbanit në zgjedhjet parlamentare të muajit prill në Hungari, ku formacioni politik Tisza, i drejtuar nga Peter Magyar, i dha fund epokës së tij 16-vjeçare në pushtet përmes një fitores së thellë. Gjatë viteve në krye të ekzekutivit hungarez, qëndrimet e tij të theksuara të djathta, qasja e rreptë kundër flukseve migratore dhe skepticizmi ndaj Bashkimit Evropian, shoqëruar me shqetësimet rreth standardeve të demokracisë, sollën ftohje të raporteve me partnerët perëndimorë në BE dhe NATO. Megjithatë, ai ruajti marrëdhënie mjaft të ngrohta me udhëheqësin amerikan Donald Trump, kreun e Kremlin-it Vladimir Putin dhe presidentin e Kinës, Xi Jinping. Në rrafshin e brendshëm, drejtësia hungareze ka vënë në lëvizje mekanizmat hetues ndaj ish-bashkëpunëtorëve të Orbanit nën dyshimet për korrupsion dhe abuzime financiare. Aktualisht, dy ish-ministra dhe ish-guvernatori i Bankës Qendrore gjenden pas hekurave, ndërsa nuk përjashtohet mundësia që hetimet të shtrihen edhe për të verifikuar ndonjë përfshirje të mundshme të vetë ish-kryeministrit. Pavarësisht diskutimeve intensive, ende nuk ekziston një vendim zyrtar e përfundimtar lidhur me këtë nismë. Një zyrtar i lartë i diplomacisë amerikane ka pranuar se në pamje të parë kjo ide mund të duket e pazakontë, por ka shtuar se kontaktet paraprake dëshmojnë dakordësi si nga Moska ashtu edhe nga Pekini, me synimin e qartë që Orban të përfaqësojë një kandidaturë unifikuese për fuqitë e mëdha. Deri më tani, Shtëpia e Bardhë, autoritetet ruse dhe ato kineze kanë preferuar të mos lëshojnë deklarata zyrtare konfirmuese mbi këto zhvillime.