Pas vrasjes tragjike të Arlinda Zekajt, thirret protestë kombëtare për mbrojtjen e grave

Pas vrasjes tronditëse të Arlinda Zekajt, Kolektivi për Mendim dhe Veprim Feminist ka mobilizuar një revoltë mbarëkombëtare me qëllim mbrojtjen e jetës dhe sigurisë së gjysmës së popullsisë në Kosovë. Tubimi protestues është caktuar të zhvillohet të mërkurën, duke filluar nga ora 16:00, në sheshin “Zahir Pajaziti” në Prishtinë. Pas tubimit në këtë shesh, pjesëmarrësit planifikojnë të marshojnë dhe të bllokojnë disa nga institucionet kryesore të vendit, përfshirë Ministrinë e Drejtësisë, Këshillin Prokurorial të Kosovës, Këshillin Gjyqësor të Kosovës, Policinë e Kosovës dhe Qeverinë e Kosovës. Përmes një deklarate të lëshuar në rrjetet sociale, ky Kolektiv ka hedhur akuza të rënda ndaj institucioneve shtetërore, duke i fajësuar për neglizhencë dhe shpërfillje sistematike ndaj sigurisë së grave. “Vrasja me sopatë e një gruaje prej kunatit mbrëmë është alarmi për luftën që iu është shpallur grave. Sikurse rastet tjera të femicidit, kjo vrasje ishte paralajmëruar nga e ndjera, e cila e kishte lutur për ndihmë një shtet që është shndërruar për vite me radhë në bashkëdoras në vrasjen e grave. Arlinda Zekaj u vra me ndërmjetësim të shtetit i cili nuk iu beson grave, i përbuz, i neglizhon ato dhe vazhdon t’i shoh parësisht si prona të burrave”, theksohet në njoftim. Organizatorët kanë vënë theksin te fakti se, ngjashëm me tragjeditë e kaluara të femicidit, viktima kishte kërkuar ndihmë paraprakisht nga organet kompetente, por thirrjet e saj kishin rënë në vesh të shurdhër. Sipas kësaj organizate, dhuna me bazë gjinore është rrënjosur thellë nga mentaliteti patriarkal dhe faji kryesor qëndron te papërgjegjshmëria institucionale, për të cilën kërkohet urgjentisht llogaridhënie. Duke paralajmëruar veprime të ashpra qytetare, Kolektivi ka bërë të qartë se protestat nuk do të ndalen vetëm me një ditë, por do të vazhdojnë në rrugë dhe para dyerve të institucioneve shtetërore. “Andaj, të mërkurën, të ejten, të premten e ditët në vijim, ne do dalim rrugëve, e do bllokojmë institucione sepse është momenti i fundit që ky shtet të jap llogari. Nisemi prej sheshit Zahiri, te Ministrinë e Drejtësisë, Këshilli Prokurorial i Kosovës, Këshilli Gjyqësor i Kosovës, Policia e deri te Qeveria”, përfundon thirrja e organizatës, e cila ka bërë thirrje për solidarizim masiv kombëtar. Në fund, u është bërë thirrje të gjithë qytetarëve që t'i bashkohen marshit protestues, për t'i bërë presion shtetit që të marrë përgjegjësinë e plotë për garantimin e sigurisë dhe mbrojtjen e jetës së grave.