Ceremonia e Topit të Artë në Londër: Ja pse Messi mungon, Kane synon trofeun historik

Ylli argjentinas Lionel Messi nuk do të marrë pjesë në mbrëmjen gala të Topit të Artë që zhvillohet sonte në Londër. Pavarësisht zërave se tetë herë fituesi i këtij çmimi prestigjioz mund të ishte i pranishëm për të dorëzuar një prej çmimeve, agjenda e tij e ngjeshur e ka bërë të pamundur këtë udhëtim. Së fundmi, Messi ka qenë tejet i angazhuar, pasi fillimisht udhëtoi në Oviedo për të marrë nderimet në ceremoninë e Çmimeve Princesha e Asturias, e më pas u kthye në Shtetet e Bashkuara për detyrimet me Inter Miamin. Pasi mori pjesë edhe në ngjarjen e quajtur Kupa Messi ditën e diel, sulmuesi argjentinas ka vendosur të mos udhëtojë drejt kryeqytetit britanik. Në krahun tjetër, Harry Kane ka zbarkuar në Londër me ambicie të qarta për të rrëmbyer kurorën e futbollistit më të mirë në botë. Sulmuesi i Bayern Munichut udhëtoi drejt Anglisë i shoqëruar nga drejtuesit e klubit bavarez, të cilët besojnë fuqishëm te shanset e tij për ta fituar këtë vlerësim madhor pas suksesit ndaj Freiburgut. Garë këtë edicion cilësohet si ndër më të hapurat dhe më të paparashikueshmet e viteve të fundit, megjithatë Kane mbetet ndër pretendentët kryesorë falë statistikave të frikshme që ka regjistruar gjatë këtij sezoni. Gjatë edicionit 2025/26, snajperi anglez tundi rrjetën 73 herë në të gjitha kompeticionet, duke fituar Këpucën e Artë dhe duke e udhëhequr Bayernin drejt triumfit në Bundesligë dhe Kupën e Gjermanisë, pa harruar edhe eqen e gjigantit gjerman deri në gjysmëfinale të Ligës së Kampionëve. Besimin e palëkundur te ky sukses e ka konfirmuar edhe drejtori ekzekutiv i klubit gjerman, Jan-Christian Dreesen, i cili po ashtu do të ndjekë nga afër ngjarjen festive në Londër. “Sigurisht, do të ishim absolutisht të kënaqur nëse Harry Kane do të fitonte Topin e Artë. Harry vendos rekorde të reja vit pas viti, por 73 golat e tij për Bayernin dhe ekipin kombëtar të Anglisë kanë një rëndësi të veçantë këtë herë”, u shpreh Dreesen. Vendi i zgjedhur për këtë edicion nuk është i rastësishëm; ceremonia po mbahet në Londër për të përkujtuar 70-vjetorin e themelimit të këtij çmimi historik, i cili u nda për herë të parë në vitin 1956, ku fitues i parë u shpall legjenda Stanley Matthews.