Kriza te Manchester United: Michael Carrick drejt shkarkimit, Eddie Howe favorit për stolin

Fatit të Michael Carrick në krye të teknikes së Manchester Unitedit pritet t'i jepet epilogu gjatë ditëve në vijim, teksa Eddie Howe po lartësohet si një ndër kandidatët kryesorë për të marrë drejtimin e gjigantit anglez. Humbja e rëndë me rezultatin 3:0 kundër Bournemouthit në “Old Trafford” ka thelluar edhe më shumë krizën e “Djajve të Kuq”, duke e çuar në tetë numrin e takimeve radhazi pa shijuar fitoren dhe duke e zhytur skuadrën në zonën e rrezikshme, fare pranë vendeve që dërgojnë në një kategori më të ulët në Premier League. Siç bëjnë të ditur burimet e “Sky Sports”, kupola drejtuese e klubit nga Old Trafforfi kishte nisur të vlerësonte opsionet për stolin edhe para këtij dështimi, pas nisjes më zhgënjyese të sezonit në historinë e tyre në Premier League. Këto lëvizje pritet të marrin hov gjatë ditëve në vijim, ku vetë Carrick do të ulet në bisedime për fatin e tij profesional, ndërkohë që drejtori i futbollit, Jason Wilcox, dhe drejtori ekzekutiv, Omar Berrada, do të mbajnë një takim vendimtar me bashkëpronarin e klubit, Sir Jim Ratcliffe. Brenda këtij konteksti delikat, emri i Eddie Howe lakohet si pasardhësi ideal për ta zëvendësuar Carrickun, duke lënë pas në këtë garë ish-selektorin e Gjermanisë, Julian Nagelsmann. Avantazhi i Howe, i cili u nda nga Newcastle Unitedi gjatë afatit kalimtar veror, qëndron te fakti se ai mund të jetë një zgjedhje më e arritshme, pasi Manchester Unitedi nuk do të kishte nevojë të derdhte dëmshpërblim për shërbimet e tij. Raportimet konfirmojnë se ai shprehet i hapur për të shqyrtuar mundësinë e uljes në stolin e skuadrës nga Manchesteri. Pavarësisht kësaj, Howe preferon të presë që drejtuesit e Unitedit të marrin vendimin përfundimtar lidhur me fatin e Carrickut, para se të hyjë në bisedime zyrtare dhe konkrete për këtë pozitë.