Kthimi i Ligjit për Gjykatën Speciale në Kuvend, Nagavci flet për mundësinë e bashkëpunimit me PDK-në

Shefja e Grupit Parlamentar të Lëvizjes Vetëvendosje, Arbërie Nagavci, ka sqaruar qëndrimin e subjektit të saj politik lidhur me vendimin për kthimin e Ligjit për Gjykatën Speciale sërish në shqyrtim në Kuvendin e Kosovës. Duke folur para gazetarëve pas përfundimit të mbledhjes së Kryesisë së Kuvendit, ajo theksoi se aktualisht institucioni ligjvënës gjendet para dy rrugëdaljeve të qarta procedurale. “Ne e dimë që proceduralisht pas kthimit të Projektligjit nga Presidentja, janë dy mundësi, që Kuvendi me 61 vota ta hedh poshtë vendimin e presidentes, apo e kundërta, ta miratojë propozimin për rikthimin e Projektligjit”, u shpreh Nagavci. Ajo shtoi se kjo çështje do të trajtohet me vëmendjen dhe seriozitetin e duhur nga ana e partisë që ajo përfaqëson. “Qëndrimet e Lëvizjes i dini. Vazhdojmë të kemi të njëjtin qëndrim që ka qenë gabim krijimi i Dhomave të Specializuara. E dyta, vlerësojmë se aktgjykimi për dënimin e krerëve të UÇK-së është i padrejtë, dhe e njëjta çështje duhet të adresohet kujdesshëm në Gjykatën e Apelit. Sa i përket ligjit specifik, i kemi pasur dilemat tona. Është keq që jemi në një situatë që u kthyem në pikën zero…”, u shpreh ajo. Në fund, sa i përket mundësisë së mbështetjes së nismës së Partisë Demokratike të Kosovës (PDK), Nagavci nënvizoi se paraprakisht duhet të ketë transparencë rreth kërkesave konkrete të tyre. “Përpara se të deklarohemi se a jemi pro mbështetjes së PDK-së në këtë pikë, duhet të dimë se çfarë po kërkon PDK-ja të ndryshojë, cilat nene specifikisht”, shtoi deputetja.