Përplasja për Nobelin e Paqes: Oslo i përgjigjet ashpër kritikave të Donald Trump

Ministri i Jashtëm i Norvegjisë, Espen Barth Eide, ka dhënë një përgjigje të hënën ndaj pakënaqësive të shprehura nga presidenti amerikan, Donald Trump, në drejtim të shtetit norvegjez. Eide ka bërë të qartë se kreu i Shtëpisë së Bardhë është plotësisht në dijeni se Komiteti i Nobelit gëzon autonomi të plotë dhe funksionet e tij janë të ndara nga pushteti ekzekutiv norvegjez. “Ai e di shumë mirë që Komiteti i Nobelit është i pavarur. Ne ia kemi kujtuar këtë, në rast se dikush po pyet veten, dhe kjo është ende kështu”, u shpreh zyrtari i lartë norvegjez. Reagimi i shefit të diplomacisë norvegjeze erdhi si kundërpërgjigje ndaj deklaratave të Trump, i cili pati ankesa ndaj vendit skandinav për shkak të mosfitimit të Çmimit Nobel për Paqen për këtë vit. Gjatë një tubimi elektoral të zhvilluar të dielën, Trump hodhi fajin te autoritetet në Oslo për anashkalimin e tij në këtë garë prestigjioze, duke e etiketuar Norvegjinë me terma të ashpër si një komb “të neveritshëm”.