Zulfaj: Asnjë reformë nuk humbet, synojmë paketën prej 882 milionë eurosh nga BE-ja

Kryenegociatori për integrimin evropian, Jeton Zulfaj, ka dhënë garanci se të gjitha ndryshimet e parapara në kuadër të Agjendës së Reformave do të zbatohen plotësisht, pavarësisht sfidave me afatet kohore. Ai pranoi se shtyrja e përfitimit të fondeve nga Bashkimi Evropian nuk është rrethanë pozitive, por siguroi se synimet e vendit mbeten të palëkundura dhe shumica e objektivave për datën 30 qershor do të jetë funksionale brenda këtij viti. Gjatë një tryeze të rrumbullakët të organizuar nga Grupi për Studime Juridike dhe Politike (GLPS), e cila u mbajt nën titullin “Rruga e Kosovës drejt BE-së pas bllokadës politike: Nga momentumi në reforma”, Zulfaj u ndal te ecuria e deritanishme e procesit, duke ritheksuar vendosmërinë e ekzekutivit. “Ne tashmë e kemi thënë disa herë që reformat nuk humben, jemi në një proces të reformave, titulli është ‘Agjenda e reformave’, sigurisht është keq kur mjetet nuk arrijnë të fitohen në kohë, kjo është çështje edhe e afateve, por të gjitha reformat të cilat kanë qenë të parapara për afatin e 30 qershorit ato janë prapë në agjendën tonë të reformave, shumica që zbatohen këtë vit. Pra, asnjë reformë nuk do të mbetet mbrapa, kur jemi tek procesi i reformues, është keq ngecja por sot kemi kohë të diskutojmë”, u shpreh Zulfaj. Sipas tij, vlerësimet objektive dhe gazetaria e bazuar në fakte luajnë një rol kyç në përmirësimin e punës qeverisëse dhe shtytjen përpara të proceseve integruese. Iniciativa në fjalë përfshin një plan prej 111 hapash të ndarë në pesë fusha kyçe, të cilat synojnë ngritjen e standardit të jetesës, përmirësimin e shërbimeve publike, hapjen e perspektivave për rininë, si dhe mbrojtjen e lirive dhe të drejtave themelore të qytetarëve. Në këtë drejtim, Kosova synon të sigurojë një mbështetje financiare prej 882 milionë eurosh, ku struktura e fondeve ndahet në një e treta grante dhe dy të treta kredi. “Kritika e mbështetur në fakte e ndihmon punën tonë dhe i përmirëson institucionet. Roli juaj është tejet i rëndësishëm, jo vetëm në kritikën konstruktive, por edhe në informimin e drejtë të opinionit publik. Plani i rritjes me 111 hapa të reformave do të sjellë reformë të madhe në shoqëri, për rritje ekonomike, shërbime publike më të mira dhe më shumë mundësi për të rinjtë. Për 882 milionë euro, sa Kosova mund të përfitojë, 1/3 janë grante dhe 2/3 janë kredi. Rëndësia e tyre nuk është vetëm tek fondet, por tek ndikimi në jetën e qytetarëve, ku përfshihen 18 institucione përgjegjëse dhe Kuvendi”, theksoi ai. Në fund, kryenegociatori kosovar vuri theksin te domosdoshmëria e një qasjeje gjithëpërfshirëse shtetërore dhe shoqërore për të përmbushur kriteret evropiane. “Procesi i anëtarësimit në Bashkimin Europian kërkon qasje dhe angazhim gjithë-shoqëror”, përfundoi Zulfaj.