Tragjedia në Pejë: PSD publikon një tjetër letër prekëse të Arlinda Zekajt dhe hedh akuza të rënda ndaj institucioneve

Natyra Kuçi nga Partia Socialdemokrate (PSD) ka bërë publike një tjetër letër të lënë nga e ndjera Arlinda Zekaj, e cila u vra tragjikisht me mjet të mprehtë në fshatin Vitomiricë të Pejës. Lidhur me këtë ngjarje të rëndë, dyshimet kryesore bien mbi kunatin e viktimës. Në dokumentin e zbardhur nga Kuçi, shfaqet shqetësimi i thellë i Zekajt drejtuar edhe kryetarit të Komunës së Pejës, ku ajo fajësonte hapur institucionet për pasivitet dhe dështim në parandalimin e dhunës me bazë gjinore. “Vrasjet nuk qenka të rastësishme! Tani e shoh a kontribuojnë institucionet në vrasjen e grave. Ju jeni njoftuar me kohë – takimi me gjyqtarin, pa veprime konkrete, është zero!”, citohet të ketë shkruar e ndjera. Më tej, në postimin e saj, Kuçi ka sjellë në vëmendje një tjetër detaj rrëqethës nga dëshmia e Arlindës: “Oj Tyre, i kishin ndalë kamerat, më sulmoi kunati para policisë e ata as nuk reaguan”. Në shkrimin e saj, përfaqësuesja e PSD-së ka kritikuar ashpër vendimet e drejtësisë, duke përmendur urdhrin e një gjyqtari që e detyronte Lindën të jetonte në të njëjtën çati me bashkëshortin, duke ruajtur vetëm një distancë formale prej dy metrash. Ajo ka denoncuar ambientin e dhunës ku, sipas letrës, bashkëshorti, kunati dhe vjehrra ishte bashkuar për ta keqtrajtuar dhe për t'i fshehur djalin, ndërkohë që organet e rendit nuk kishin ofruar mbrojtjen e duhur. Në mesazhin e saj, Arlinda kishte paralajmëruar: “Pas vrasjes sime nuk pres të përgjigjeni – por pres të mos mund të flini”. Sipas Kuçit, Policia dhe sistemi gjyqësor në Pejë kanë qenë plotësisht në dijeni se jeta e Arlindës ishte në rrezik konstant. Ajo theksoi se institucionet kanë dështuar në garantimin e sigurisë së saj dhe në zbatimin e vendimeve të gjykatës që do t'i mundësonin asaj takimin me djalin e saj larg mjedisit kërcënues.