Vlerat e bashkëjetesës fetare në Kosovë në fokus të takimit mes Shiroka Pulës dhe myftiut Tërnava

Kreu i Bashkësisë Islame të Kosovës, myftiu Naim Tërnava, ka zhvilluar sot një takim zyrtar me presidenten e vendit, Justina Shiroka Pula, në selinë presidenciale. Gjatë këtij takimi, myftiu Tërnava i ka përcjellë urimet më të sinqerta presidentes për marrjen e detyrës së re, duke i dëshiruar suksese të plota në përmbushjen e mandatit institucional. Sipas njoftimit zyrtar, në qendër të bisedës kanë qenë rëndësia e ruajtjes së harmonisë ndërfetare dhe kultivimi i traditës së gjatë të tolerancës, mirëkuptimit dhe respektit reciprok në shoqërinë kosovare. “Presidentja Shiroka Pula vlerësoi kontributin e Bashkësisë Islame të Kosovës në promovimin e harmonisë ndërfetare dhe në forcimin e vlerave të solidaritetit, paqes dhe mirëkuptimit ndërmjet qytetarëve. Ajo theksoi se bashkëjetesa ndërfetare dhe respektimi i diversitetit janë vlera të rëndësishme të shoqërisë së Kosovës dhe pjesë e identitetit të saj qytetar, të cilat duhet të ruhen e të kultivohen edhe në të ardhmen”, thuhet në njoftim.