Operacioni i Doganës: Sekuestrohet kanabis në formë cigareve dhe tortesh në një pako postare

Gjatë një kontrolli rutinë në një dërgesë postare, autoritetet doganore kanë arritur të identifikojnë dhe bllokojnë një sasi lënde narkotike. Bëhet fjalë për dhjetë cigare dhe dy copë torte, të cilat dyshohet se përmbajnë substancë narkotike të llojit kanabis. Sipas informacionit zyrtar nga Dogana e Kosovës, sinjalet e para të dyshimit u shfaqën gjatë procesit të skanimit të pakos. Kjo nxiti autoritetet që të procedonin menjëherë me një kontroll fizik të imtësishëm të dërgesës. Me hapjen e pakos, dyshimet e zyrtarëve u konfirmuan, pasi brenda saj u gjetën produktet e dyshimta të mbushura me lëndë narkotike, të cilat u sekuestruan në vend. Për këtë ngjarje, Dogana e Kosovës ka njoftuar menjëherë Njësinë Antidrogë të Policisë së Kosovës, për të ndërmarrë hapat e nevojshëm hetimorë konform procedurave ligjore në fuqi. Pakoja bashkë me përmbajtjen e saj është ndalur për hetime të metejshme nga organet kompetente. Në njoftimin e tyre, autoritetet doganore theksojnë se do të vijojnë angazhimin e palëkundur për të parandaluar çdo tentativë kontrabande dhe qarkullimi të paligjshëm të mallrave, duke fuqizuar bashkëpunimin ndërinstitucional për luftimin e dukurive të tilla.