Hansi Flick tregon shkakun kryesor të humbjes së Barcelonës në El Clasico

Strategu i Barcelonës, Hansi Flick, ka analizuar humbjen ndaj Real Madridit, duke pranuar se ekipi i tij çedoi në aspektin fizik dhe energjetik, pavarësisht se bëri një fraksion të dytë të ndeshjes mjaft të mirë. “Jo, nuk jam i kënaqur me paraqitjen. Sot u vu re se nuk e kishim gjallërinë e plotë dhe nuk ishim 100 për qind të gatshëm fizikisht. Zakonisht jemi më aktivë dhe më energjikë sesa që u shfaqëm sot. Mendoj se mund të kishim krijuar më shumë raste, por paraqitja jonë në pjesën e dytë ishte e mirë”, u shpreh trajneri gjerman pas ndeshjes ku katalonjasit u mposhtën me rezultatin 2-1 në El Clásico. Tekniku i Blaugranave vuri theksin te fakti se formacioni i tij diti të reagonte pasi rivali pati mundësi të dyfishonte epërsinë. Sipas tij, goli i barazimit 1-1 i dha një shtysë të madhe besimi skuadrës për të kërkuar përmbysjen. “Real Madridi pati dy raste për ta shënuar golin e dytë, por më pas arritëm të riktheheshim në ndeshje dhe ta kontrollonim rrjedhën e saj. E shënuam golin e barazimit, 1-1, i cili ishte jashtëzakonisht i rëndësishëm për ne”, shtoi ai. Më tej, Flick ka zbuluar se në atë fazë të sfidës kishte pasur ndjesinë se momentum-i i takonte skuadrës së tij, mirëpo një gabim fatal gjatë daljes nga mbrojtja nën presionin e kundërshtarit rezultoi vendimtar. “Në atë moment ndjeva se ndeshja po shkonte në favorin tonë dhe se ne kishim epërsinë në lojë. Por, në fund, e përsëritëm të njëjtin gabim. Teksa po përpiqeshim ta ndërtonim lojën nën presionin e kundërshtarit, Real Madridi arriti të na e merrte topin dhe të niste menjëherë një kundërsulm, nga i cili shënoi golin”, përfundoi shpjegimin e tij trajneri. Pavarësisht zhgënjimit, Flick theksoi se katalonjasit duhet të pajtohen me këtë epilog dhe të nxjerrin mësime të vlefshme, duke kujtuar se disfatat përbëjnë një pjesë të pashmangshme të këtij sporti. “Duhet ta pranojmë atë që ndodhi. Sigurisht, ky nuk është rezultati ideal për ne, por duhet të përballemi me këtë situatë, sepse edhe humbjet janë pjesë e futbollit”, përfundoi Flick. Përkundër këtij hapi fals në El Clásico, Barcelona vazhdon të ruajë kreun e renditjes në La Ligë me 27 pikë në konton e saj, e ndjekur nga Atletico Madridi që renditet e dyta me 25 pikë, ndërsa Real Madridi zë vendin e tretë me 24 pikë.