Tragjedia në Vitomiricë: Letra e paralajmërimit që Arlinda i dërgoj Prokurorisë tri ditë para se të vritej nga kunati

“Uroj që të mos vijë dita kur ju dhe institucionet përgjegjëse të detyroheni të jepni llogari vetëm pasi të jetë marrë jeta ime”. Këto ishin fjalët e rënda që Arlinda Sylaj Zekaj kishte shënuar në një shkresë zyrtare drejtuar Kryeprokurores së Prokurorisë Themelore në Pejë, dokument ky që mban vulën e pranimit të datës 22 tetor 2026. Vetëm 72 orë më vonë, më 25 tetor, ajo u ekzekutua në mënyrë makabre brenda shtëpisë së saj në Vitomiricë, ndërkohë që për këtë krim të rëndë dyshohet kunati i saj. Portalit tonë i është vënë në dispozicion kjo letër alarmante, përmes së cilës viktima kërkonte ndërhyrjen e menjëhershme të instancave shtetërore, zbatimin e një urdhri gjyqësor dhe nisjen e hetimeve ndaj zyrtarëve që, sipas saj, kishin shfaqur papërgjegjësi në detyrë. Dokumenti, i kualifikuar si urgjent, sillte në vëmendje një rrezik real dhe të vazhdueshëm për jetën e saj, ndërsa ajo akuzonte institucionet se po ia kalonin përgjegjësinë njëra-tjetrës pa ndërmarrë asnjë veprim konkret. Në të njëjtën letër, 49-vjeçarja kishte kërkuar angazhimin e Qendrës për Punë Sociale dhe hetimin e plotë të çdo zyrtari të përfshirë. “Kjo është shtesa ime e fundit”, kishte shkruar ajo, duke shfaqur hapur frikën se institucionet do të reagonin vetëm pasi të ishte tepër vonë. Ajo e kishte mbyllur mesazhin e saj me një konstatim rrëqethës: “Tani po e kuptoj pse ka kaq shumë vrasje!”. Vetëm tri ditë pas këtij denoncimi zyrtar, ajo u gjet pa shenja jete në dhomën e gjumit të shtëpisë së saj, e cila ndodhet në rrugën “Man Dedushaj” në Vitomiricë. Lidhur me këtë ngjarje tronditëse, Policia e Kosovës ka bërë publike detajet e hollësishme, duke sqaruar se gjithçka kishte nisur mbrëmjen e të dielës kur ishte raportuar një rast i dhunës në familje. Sipas raportit zyrtar të policisë, rreth orës 19:00, autoritetet në Pejë kishin marrë njoftimin për dhunë në familje, pas së cilës viktima ishte shoqëruar në stacion për t'u intervistuar. Bashkëshorti i saj ishte ndaluar menjëherë, duke u dërguar në mbajtje për 48 orë. Pas përfundimit të të gjitha procedurave fillestare, gruaja ishte rikthyer në banesën e saj në Vitomiricë me dëshirën e saj të lirë. Megjithatë, rreth orës 21:10, policia është alarmuar sërish pasi ajo është gjetur e vdekur. Në vendngjarje kanë mbërritur menjëherë njësitë relevante dhe ekipi mjekësor, i cili vetëm ka mundur të konstatojë vdekjen e 49-vjeçares. “Bazuar në të dhënat fillestare, dyshohet se vdekja e saj ka ardhur si pasojë e goditjeve me një mjet të fortë”, thuhet në njoftimin zyrtar të Policisë. Ndërkohë, personi i dyshuar për kryerjen e këtij krimi makabër, i cili dyshohet se është kunati i viktimës, ndodhet aktualisht në arrati dhe po kërkohet nga organet e rendit. Prokurori i Shtetit ka dalë menjëherë në vendin e ngjarjes, ndërsa autoritetet policore po vazhdojnë hetimet intensive për të zbardhur plotësisht rrethanat e kësaj vrasjeje dhe për kapjen e autorit të dyshuar.