Zgjedhjet në Serbi: Shaip Kamberi kryen obligimin qytetar në Tërnoc dhe u bën thirrje shqiptarëve për pjesëmarrje masive

Kryetari i listës “Koalicioni Shqiptar”, Shaip Kamberi, ka ushtruar të drejtën e tij të votës në vendlindjen e tij, në Tërnoc të Preshevës, në kuadër të procesit zgjedhor që po zhvillohet sot në Serbi. Pas votimit, ai u ka bërë thirrje të gjithë qytetarëve shqiptarë që të dalin në zgjedhje dhe të shfrytëzojnë këtë mundësi demokratike. “Ne kemi përmbushur pjesën tonë të përgatitjeve për këto zgjedhje, tash e kryva edhe detyrën time qytetare. Ajo që pres nga qytetarët, banorët e Tërnocit por dhe gjithë Luginës së Preshevës duhet të shfrytëzojnë në mënyrë masive të drejtën e tyre për të votuar. Është e drejtë demokratike që askush nuk mund të cenojë. Është obligim moral, edhe kombëtar, edhe politik që të kryejë këtë detyrë dhe të marrë pjesë në zgjedhje”, u shpreh Kamberi. Sipas të dhënave preliminare, deri në orën 10:00 në komunën e Preshevës kanë votuar 1,090 qytetarë, shifër kjo që përbën 2.5 për qind të popullsisë rezidente. Gjatë ditës së sotme, procesi zgjedhor në qendrat e votimit në Preshevë është ndjekur nga afër edhe nga vëzhgues të trupave të OSBE-së, të cilët kanë qenë të pranishëm për të monitoruar mbarëvajtjen e tij. Kujtojmë se në mandatin e kaluar parlamentar, Shaip Kamberi ka mbajtur postin e deputetit në Kuvendin e Serbisë.