Kriza e mbeturinave në shkollat e Prishtinës: Pse po përplasen sindikatat, kompanitë private dhe komuna?

Ambientet e disa institucioneve arsimore në kryeqytet vazhdojnë të ballafaqohen me grumbullimin e mbeturinave, ndërkohë që situata e krijuar duket se nuk po përbën shqetësim urgjent për autoritetet komunale të Prishtinës. Prej javësh, stafi teknik i shkollave fillore dhe të mesme në Prishtinë ka hyrë në grevë, e cila është paralajmëruar se do të vazhdojë. Sipas Federatës Sindikale të Punëtorëve Teknikë të Sektorit Privat të Kosovës, pagat e muajit shtator jo vetëm që janë ekzekutuar me vonesë, por nuk respektojnë as pragun e përcaktuar të pagës minimale prej 500 eurosh bruto. Pavarësisht kësaj situate, Komuna e Prishtinës refuzon të marrë mbi vete përgjegjësinë për kompensimin financiar të këtyre punonjësve. Edhe pse institucioni komunal lidh kontrata financiare me operatorë privatë për mirëmbajtjen dhe pastrimin e shkollave, ai nuk ofron transparencë mbi fondet e ndara dhe zbatimin praktik të pagës minimale. "Për sektorin privat nuk përgjigjemi ne, por kompanitë private", thuhet në një përgjigje të shkurtër me shkrim nga Komuna e Prishtinës. Megjithatë, nga ky institucion kanë shmangur përgjigjen se a janë tenderët e pastrimit të harmonizuar me pagën aktuale minimale. Lidhur me këtë çështje, është kërkuar qëndrim edhe nga kompania private ‘ERIK ShPK’, e cila menaxhon pastrimin e disa prej shkollave në qytet. Përmes një komunikimi telefonik, një zyrtare e këtij subjekti ka udhëzuar që pyetjet të dërgohen në adresën zyrtare elektronike, por deri në publikimin e këtij artikulli nuk ka pasur ndonjë përgjigje. Edhe Inspektorati Qendror i Punës ka evidentuar vonesa të përsëritura në disbursimin e pagave, veçanërisht për punonjësit e sektorit të pastrimit. Nga ana e tij, kryetari i Sindikatës së Pavarur të Sektorit Privat, Jusuf Azemi, pohon se ekzistojnë informacione se Komuna e Prishtinës disponon mjete të mjaftueshme buxhetore për shlyerjen e këtyre detyrimeve, ndërsa arsyet e bllokimit mbeten të paqarta. Për sa kohë pagat nuk ekzekutohen, Azemi ka theksuar se greva do të vijojë, pasi mbështetet në baza ligjore dhe punëtorët nuk do të tërhiqen deri në plotësimin e kërkesave të tyre. Azemi: Kemi informacione që komuna e Prishtinës ka mjete, nuk di pse nuk i ekzekuton pagat “Është shumë e rëndë sepse është një qëndrim i punëtorëve që me të drejtë që përderisa mos të paguhen, mos ti kryejnë të gjitha borxhet, nuk duan me filluar me punuar. Kemi informacione që komuna e Prishtinës ka mjete, kemi informacione edhe shumë normale që vendimi i qeverisë së Kosovës i mirë për dikënd apo i keq për dikënd, ai duhet të respektohet. Pse nuk po e respekton komuna e Prishtinës, ne nuk po mund të arrijmë deri te një vendim përfundimtar, por megjithatë, derisa komuna e Prishtinës heziton ta bën pagesën, neve po na vjen keq, po punëtorët teknikë të shkollave të mesme dhe shkolla fillore nuk do të kthehen procesin e punës sepse kanë mbështetjen e tyre ligjore dhe nëse ata kanë llogari edhe ne duhet ta shtymë edhe pse pa dëshirën tonë”, u shpreh Azemi. Ai shtoi se aktualisht këta punonjës trajtohen me një pagë mujore prej 391 eurosh. I revoltuar nga kushtet e rënda, Azemi ka bërë të inur se çdo muaj vendin e lënë rreth 4,500 punëtorë, ndërsa në nivel vjetor shifra arrin në 50 mijë, duke kërkuar një reagim urgjent nga Komuna e Prishtinës dhe Qeveria e Kosovës. Azemi: Çdo vit ikin nga 50 mijë punëtorë, me këto paga s’po na lënë të vdesim por s’mund as të mbijetojmë “Një kryefamiljar që më së paku i ka katër anëtarë të familjes. Në fund të muajit i merr 391 euro dhe ato nuk i japin me kohë. Nuk donë një filozofi me e pa që pikërisht këto veprime që janë duke i bë edhe komuna e Prishtinës edhe qeveria të jenë në dijeni që vetëm brenda çdo muaji nga Kosova ikin 4,500 punëtorë, ndërsa në vit 50 mijë punëtorë”, përfundoi ai.