Nisja e furishme në Arabi, Nedim Bajramit i duhen vetëm pak minuta për të lënë gjurmë

Mesfushori i kombëtares shqiptare, Nedim Bajrami, ka konfirmuar formën e tij të shkëlqyer në kampionatin e Arabisë Saudite, duke gjetur rrugën e rrjetës vetëm pak çaste pasi është hedhur në fushë me fanellën e Al-Taawoun. Futbollisti 27-vjeçar u aktivizua nga stoli në minutën e 72-të të sfidës, duke marrë besimin e stafit teknik për të ndryshuar rrjedhën e lojës në një moment kyç për skuadrën e tij. Për të lënë shenjë, Bajramit i janë dashur vetëm gjashtë minuta lojë, kohë në të cilën ka realizuar një gol mbresëlënës me një goditje të fuqishme nga distanca, duke mos i lënë asnjë shans portierit kundërshtar. Pavarësisht shkëlqimit individual të mesfushorit kuqezi, sfida e javës së 11-të të elitës saudite nuk ka shkuar sipas parashikimeve për skuadrën e tij, pasi Al-Riyadh ka arritur të triumfojë me rezultatin 2-1 ndaj Al-Taawoun.