Japoni: Shifra historike e vetëvrasjeve shënon uljen më të madhe, por alarmojnë të dhënat te të rinjtë

Japonia ka regjistruar një rënie të ndjeshme dhe historike të vetëvrasjeve gjatë vitit të kaluar, megjithatë shqetësim mbetet rritja e vazhdueshme e këtij fenomeni tragjik te grupmoshat e reja. Shteti aziatik, i cili historikisht është ballafaquar me shifra të larta të vetëvrasjeve në rang global, gjatë vitit 2025 ka shënuar 19 mijë e 097 raste, duke shënuar kështu nivelin më të ulët që nga nisja e regjistrimeve zyrtare në vitin 1978. Megjithatë, nga ky total, 532 raste i përkasin nxënësve të shkollave, duke shënuar shifrën më të lartë prej fillimit të evidentimit të të dhënave në vitin 1980. Sipas statistikave të publikuara nga Ministria e Shëndetësisë, Punës dhe Mirëqenies, si dhe nga Agjencia Kombëtare e Policisë, bëhet fjalë për 352 nxënës nga shkollat e mesme, 170 nga cikli i ulët i shkollës së mesme dhe 10 nga shkollat fillore. Autoritetet japoneze bëjnë me dije se motivet pas këtyre ngjarjeve te nxënësit e të gjitha cikleve shkollore lidhen kryesisht me sfidat familjare, problemet shëndetësore dhe vështirësitë në ambientet shkollore. Në kuadër të hulumtimit të kësaj dukurie, qeveria japoneze ka analizuar 4 521 raste të trajtuara në qendrat e urgjencës dhe kujdesit kritik në mbarë vendin midis fundit të vitit 2022 dhe fundit të vitit 2024. Analiza ka nxjerrë në pah se shumica e pacientëve ishin femra dhe një pjesë e konsiderueshme e tyre kishin shfaqur sjellje të përsëritura vetëlëndimi. Rreth gjysma e tyre kishin siguruar vetëm informacione, ndërsa vetëm rreth 20% kishin pasur lidhje me mekanizmat e mbështetjes nga institucionet mjekësore lokale apo organizata të ndryshme. Në një dokument zyrtar të qeverisë, të publikuar të premten, është vënë theksi te domosdoshmëria e ofrimit të mbështetjes që synon parandalimin e rreziqeve të vetëvrasjes dhe vetëlëndimit tek të rinjtë, përmes forcimit të bashkëpunimit dhe kontakteve me institucionet mjekësore. Statistikat tregojnë se numri i përgjithshëm i vetëvrasjeve tek nxënësit e shkollave fillore, të mesme të ulëta dhe të larta vitin e kaluar ishte 538, duke shënuar një rekord të ri për të dytin vit radhazi, sipas dokumentit të bardhë të vitit 2026 mbi masat parandaluese. Ndërkohë që ky vit shënon dyvjetorin e themelimit të ligjit bazë për parandalimin e vetëvrasjeve, qeveria ka analizuar ecurinë e trendeve ndër vite. Që nga viti 1998, shifrat qëndronin rreth 30 mijë për shkak të krizës ekonomike, para se të regjistronin një ulje graduale në vitin 2010 dhe të arrinin rekordin më të ulët me 19 188 raste vitin e kaluar. Analiza e treguesve për 100,000 banorë tregon se rënia ka qenë më e theksuar te burrat e moshës së mesme dhe të moshuarit, një zhvillim që lidhet me zbutjen e faktorëve socio-ekonomikë. Përkundër kësaj, një rënie e tillë nuk është vërejtur te punëtorët beqarë, studentët dhe gratë e punësuara që jetojnë në familje, ndërsa shkalla e vetëvrasjeve ka shënuar rritje te personat 19 vjeç e lart dhe te gratë në të 20-at e tyre.