Goditje ndaj prerjeve ilegale në Shtip: Policia sekuestron automjete dhe sasi të madhe drurësh zjarri

Në kuadër të një operacioni të përbashkët të ndërmarrë nga Ministria e Punëve të Brendshme, ndërmarrja publike “Pyjet e Maqedonisë” dhe Policia Pyjore, janë bllokuar dhe sekuestruar disa automjete që shërbenin për transportimin e paligjshëm të drurëve në rajonin e Shtipit, konfirmoi Kire Mihailov. Operacioni është zhvilluar në orët e para të mëngjesit dhe ka pasur në shënjestër një rrjet personash që dyshohet se janë marrë me vjedhjen e pyjeve në këtë zonë përgjatë një periudhe të gjatë kohore. Gjatë kontrolleve të ushtruara në disa lokacione të ndryshme në malin Plaçkovica, autoritetet kanë kapur automjete të ndryshme të cilat po transportonin sasi të konsiderueshme dru zjarri, të cilat ishin prerë në mënyrë të paligjshme dhe pa pullat përkatëse zyrtare. Duke folur për aksionin, Mihailov theksoi se operacione të tilla terreni do të vijojnë edhe në të ardhmen, duke dërguar mesazhin e prerë se autoritetet nuk do të lejojnë që asnjë rajon i vendit të bëhet pre e aktiviteteve të paligjshme të hajnisë pyjore.