Superderbi Shkëndija – Vardari, flet mesfushori kryesor: Jemi gati për betejën e madhe në Gostivar

Kampioni në fuqi i Maqedonisë së Veriut, Vardari i Shkupit, shfaqet plotësisht i përgatitur për sfidën e madhe kundër kryesuesve të renditjes, Shkëndijës nga Tetova. Ndeshja derbi mes këtyre dy rivalëve të mëdhenj është planifikuar të zhvillohet sot, duke filluar nga ora 14:00, në stadiumin e qytetit në Gostivar. Ndërkohë, drejtësinë në këtë përballje do ta ndajë gjyqtari Stojançe Trpçevski. Përveç Shkëndijës dhe Vardarit, në garën e fortë për trofeun e kampionit është edhe skuadra e Struga Trim Lum, duke e bërë këtë edicion futbollistik jashtëzakonisht garues. Këtë situatë e kupton qartë edhe David Babunski, një nga shtyllat kryesore të mesfushës së Vardarit, i cili ka shprehur besimin e madh që mbretëron brenda kampit të skuadrës së drejtuar nga trajneri Miodrag Bozhoviq. “Jemi të vetëdijshëm për rëndësinë e kësaj ndeshjeje. Jemi përgatitur mirë dhe presim një duel të fortë, ku gjithçka do të vendoset nga nuancat dhe detajet më të vogla. Kemi hyrë në një seri të mirë dhe presim që kjo ecuri pozitive të vazhdojë edhe në derbin kundër Shkëndijës. Këtë herë do të luajmë në Gostivar. Të dyja skuadrat janë ndër më cilësoret në vend, kemi respekt të ndërsjellë dhe besoj se do të ofrojmë futboll të bukur. Ne synojmë tri pikët dhe do të bëjmë gjithçka për ta arritur qëllimin”, u shpreh David Babunski. Në aspektin e statistikave, suksesi i fundit si mysafir i Vardarit ndaj skuadrës kuqezi daton më 27 tetor të vitit 2025. “Ende i kam të freskëta kujtimet nga ajo ndeshje. Vardari kishte kaluar një kohë të gjatë pa fituar në udhëtim ndaj Shkëndijës, por luajtëm me guxim dhe arritëm të triumfonim. Tani përbërjet e skuadrave kanë ndryshuar pjesërisht, por ka edhe futbollistë që ishin të pranishëm në atë takim. Sidoqoftë, kjo do të jetë një histori e re në derbit mes Shkëndijës dhe Vardarit. Ne udhëtojmë me shumë optimizëm dhe vetëbesim”, përfundoi organizatori i lojës së Vardarit.