Protesta studentore në Tiranë, Berisha: Dhjetëra mijëra qytetarë nga e gjithë Shqipëria në mbështetje të revoltës

Kryetari i Partisë Demokratike, Sali Berisha, ka deklaruar se kryeqyteti është mbushur me qytetarë nga të gjitha skajet e vendit për t'i dalë në krah protestës së studentëve, ndërsa nuk ka dhënë një konfirmim përfundimtar nëse do të jetë i pranishëm fizikisht në shesh. Gjatë hyrjes së tij në selinë e partisë, ai u përgjigj para gazetarëve, duke theksuar se tashmë e gjithë Shqipëria është bërë bashkë në Tiranë. Sipas kryedemokratit, sindikatat dhe subjektet politike opozitare i janë bashkuar fuqimisht kësaj lëvizjeje revoltuese, ndërkohë që ngriti akuza të rënda ndaj ekzekutivit për përdorim të dhunës ndaj protestuesve. “Sot, Shqipëria është e tëra në Tiranë në mbështetje totale të studentëve dhe kundër narkodiktatorit që po përdor dhunë barbare ndaj tyre. Sot, studentë, sindikata, forca politike opozitare, janë në mbështetje më të fuqishme të revoltës studentore. Me dhjetëra mijëra shqiptarë po vijnë nga të katër anët e vendit, kanë ardhur mbrëmë. Beteja e narkodiktatorit, beteja e Edvin Kristaq Xhelatit ndaj studentëve do të jetë fundi i tij i turpshëm, fundi që meriton”, u shpreh Berisha. Kjo protestë mbarëkombëtare vjen pas një valë tubimesh studentore gjatë ditëve të fundit. Pritshmëritë janë që tubimit të sotëm t'i bashkohen gjithashtu pedagogë, figura të artit, sindikalistë, si dhe qytetarë të thjeshtë nga qytete të ndryshme të vendit.